Sunderland hnehna changin an hmelma Newcastle bakah Norwich hnawtchhuak
Nilaini zan khan Sunderland-in Premier League-a inham tang turin Everton chu Patrick van Aanholt freekick leh de-fen-der Lamine Kone goal hnih hmangin 3-0 in an sawp. He result hian Sunderland ṭhenawm leh hmelma Newcastle United a hnawtchhuak a; Watford hnehtu Norwich City pawh an tla.
Judgement Night
Newcastle United-in Inrinni zan khan tla chiang Aston Villa lamah goal an khung thei lo a, point khat chiah an hmu. Magpies chetsual ṭum hian Norwich City-in Manchester United an hneh lo. Hetihlai hian Sunderland erawhin Chelsea an hneh thung a, hei vang hian Sam Allardyce-a hote tan him turin vawi khat chak chiah an mamawh.
Nilaini zan hian Carrow Road-ah Norwich City-in Premier League khelh zel beiseiin Watford 4-2 in an hneh. Watford-in Troy Deeney hmangin hma hruai zet mah se Canaries-in Nathan Redmond leh Dieumerci Mbokani te goal bakah Craig Cathcart own goal hmangin an chhang let. Hornets-in Odion Ighalo goal hmangin beiseina thar an nei a, amaherawhchu Congolese forward Mbokani-a'n goal hnihna khungin Norwich City 4-2 in an chak.
Alex Neil-a hote tan point thum hi result ṭha a ni ngei a, inkhel dang result-a avangin a ṭha tluan tling ta lo.
Inkhel dangah Sunderland-in an mikhual Toffees chu 3-0 in a hneh a, Norwich beisei a tawp ang chiahin Rafael Benitez-a'n Newcastle hmun himah a hruai thei lo.
Sunderland hian ṭan phat aṭangin inkhel an thunun a, Everton keeper Joel Robles a rim nghal hle. Spanish keeper hian Van Aanholt-a freekick a chhût sual a, Toffees-in goal an chhuah phah.
Amaherawhchu Lamine Kone-a goal khung kawh lutukah Spanish keeper a dem theih lo a, goal thumnaah erawh Robles-a'n corner kick a teh sual leh bawk avang-in Kone-a'n chiang takin Sun-derland goal thumna a khung. Black Cats an khel ṭha a, 3-0 in an chak a, season tharah Premier League-ah an inlan leh ang.
Chhandamtu Allardyce
Sunderland hian season
ṭantirh khan season liam taa chhandamtu Dick Advocaat an ruai zui a, amaherawhchu Dutch manager hnuaiah hian vawi riat khelin chak an nei lo.
Advocaat-a'n a hna a tlin lo tih hriain banna a thehlut a, Dutch manager thlakna tura Sunderland lakluh chu manager tawnhriat nei ṭha Sam Allardyce a ni.
English manager club tenau enkawl thiam tak Allardyce a hnuaiah Black Cats-in chak
ṭumte an neih chhoh rualin a zawna vawi nga chak lohte an neih avangin relegation an chhuahsan meuh lo. Tun season chhung zawngin Sunderland thlen san lai ber chu 17-na a ni a, season tawp lamah Jermain Defoe chet ṭhat an chhawr bawk.
Sunderland hi an match hnuhnung 13-ah vawi hnih chiah an chak lo a, match hnuhnung pangaah chak loh nei loin vawi thum lai an chak bawk.
Black Cats an him a, an alwmna tizual turin an ṭhenawm leh an hmelma kumhlun Newcastle an nek chhuak - season thar Premier League-ah 'Northeast derby' boruak ṭang tak kan hmu dawn ta lo.
Newcastle an tla
Kum 2000 bawr vela cham-pion thei tur zinga chhiar tel
ṭhin Newcastle-in club lian tih dan angin pawisa an hmang tam tho a, coach an lak fuh tawk loh leh supporter-te'n club neitu Mike Ashley an duh loh vanga club chhung buaina chu an tlakna chhanah a ngaih theih.
Newcastle hian Derby County duh loh Steve McClaren an la lut a, England manager hlui hian March 11 thleng a enkawl. Man United assistant manager hlui an ban hian Magpies hi 19-naah an awm a, chhanhim theih an la ni.
Beisei nei takin Magpies-in Real Madrid duh loh Rafael Benitez an la lut a, Liverpool manager hlui hnuaiah hian match nga an khelh hnuah chauh chak hmel an hmu. Newcastle hi match 9 enkawlin vawi hnih chiah a chakpui a, vawi thum an chak loh avangin England-a a hming ṭhat tawhna a belhchhah thei ta lo.
Lawm leh lawm lo
Norwich boss Alex Neil chuan, "Inkhel pawimawhah kan tihsual ṭhin avangin point kan hloh a, squad ti hak turin player kan la lut ṭha tawk lo. Tuna kan dinhmun hi chu a hrehawm takzet a, Premier League aṭanga kan tla hi a pawi kan ti hle a ni," tiin an tlak chhan a sawi.
Dick Advocaat-a'n banna a thehluh khan Sunderland tan beisei tur a awm tawh loh thu a sawi. Sam Allardyce chuan, "Dick-a thusawi a dik lo tih kan result hmanga kan lantir thei hi a lawmawmna belhchhahtu a ni. Dick kha coach tawnhriat nei ngah a nih avangin ka zah a, amaherawhchu a thusawi kha player fuih nan ka hmang thung," tiin a sawi.
Kum 61-a upa English mana-ger chuan sawi zelin, "Premier League-in sponsor a neih ṭhat avangin tun season-a tlak hi a pawi lehzual a, chuvangin tuna kan hlawhtlinna hian minti hlim hle. December thla khan a zawnin vawi nga kan chak lo a, transfer huna pound maktaduai 15 senga Jan Kirchhoff leh Lamine Kone te kan la lut kha ka tifuh a. Supporter-te ka chhungah an dawhthei a, match khat khelh hmabaka kan him hi thil mak a ni," tiin a hun tawn chungchang a sawi.