Welbeck a chawl rei dawn

Danny Welbeck chu a khup zai a ngaih dawn avangin thla kaw chhung khelmualah a hmel kan hmu thei dawn lo.

England international Welbeck hian kartawp Premier League inkhela Manchester City nen 2-2 a an inhnehtawk ṭumin a khupah hliam a tuar a, June thlaa khelh ṭan tawh tur Euro 2016-ah pawh a hmel kan hmu thei dawn lo tihna a ni.

Arsenal manager Arsene Wenger chuan Etihad Stadium-a an inkhelh zawh khan a striker chungchangah hian a hlauhtawh thu a lo sawi tawh a, Gunners hian an player hi tun hmaa a lo hliam tawhna sa ni loah hliam dang a tuar niin an tarlang.

Manchester United player hlui hi season tir lam khan a khup veilam na vangin thla sarih lai a lo chawl tawh a, February aṭang khan a rawn inkhel thei ve leh chauh. A hliam dam hnuah Gunners tan match 16 a khelh aṭanga goal nga khungin Roy Hodgson-a'n Euro khel tura a koh ngei rin ni mah se tunah erawh beisei loh danin hun a hmang dawn zawk ta a ni.

Kum 25-a upa Wel-beck hian Euro 2016 qualifying a khel ṭha takzet a, goal ruk khungin Wayne Rooney chiah tluk loh a nei. England hian Arsenal player tho Alex Oxlade Chamberlain chu khup na vangin Euro khel turin an hruai thei dawn lo a ni.