July-ah Mourinho a lo kir dawn

Chelsea duh loh hnu manager Jose Mourinho chuan July thlaah club enkawl tura a lo kir leh tur thu a sawi. Kum 53-a upa manager hi club nei loin a awm mek a, season tharah a lo kir ngei tur thu sawi mah se a club enkawl tur erawh a sawi lang lo thung.

Manchester United nena sawizawm hlawh mek manager chuan, "July-ah ka lo kir leh ang. Tunah chuan May chauh a la ni a, hlim taka ka hun awl neihte hman ka duh a ni. Football hian ka lung min len miau avangin season tharah hian ka lo kir ang," tiin a lo kir leh tur thu a sawi.

Mourinho hian July-a a lo kir leh tur thu hi FIFA legends leh Mexican All-Star team an inkhelh ṭuma a sawi a ni a, a enkawl FIFA legends hi he inkhelah hian 9-8 in an tlawm.

Portuguese manager chuan United chungchang sawilangin, "Manchester United nena kan chung-changah engmah hriat ka nei lo. Tunah chuan club ka nei rih lo a, FIFA Legends te hian hnehna min chanpui se chu club hmuh ka awlsam deuh tur," tiin fiamthu a thawh zui.