Barca leh Real inlan zan Zaninah La Liga champion a hriat dawn

Premier League, Ligue 1, Bundesliga leh Serie A-ah te champion team a hriat tawh a, Spanish La Liga-ah erawh tun thlengin champion team a la hriat ve loh - zaninah engkim a chiang dawn.

La Liga-ah champion thei team pahnih an la awm a, hmahruaitu Barcelona leh pahnihna Real Madrid an inlan dawn. Barcelona tan champion turin engkim an kutah a innghat a, Real tan Catalan club chetsual chan tel a ngai thung.

Spanish club lian zingah Atletico Madrid inlan dawn mah se Diego Simeone-a naute hian karhmasa Pathianni khan Levante chu 2-1 a an hneh loh avangin league nomawi an beisei thei tawh lo a, zanin dar 11:00-a Celta Vigo nena an inhmachhawn tur hi Argentine manager hian Champions League final an khelh tur inpuahchah nan a hman a rinawm.

Champion beisei Real

Rafael Benitez-a enkawlna hnuaiah Real Madrid-in cham-pion beiseina hloh hman mah se Barcelona tawlhthluk leh manager thar Zinedine Zidane-a hnuaia harhtharna an chan a in nang a, match khat chiah khelh tur la awmah Real Madrid-in nomawi chawi beiseina an la nei.

Real Madrid hian zanin dar 8:30-ah Deportivo La Coruna an lenchilh dawn a, chak result an hlawh chhuah a, Barcelona-in khualmuala hnehna an chan zawh loh bawk chuan La Liga champion an ni ang.

Zidane-a naute tan cham-pion kalkawng hautak deuh mah se striker Jese Rodriguez erawh a zam phah lo. Spanish forward chuan, "Deportivo hma-chhawn turin nasa takin kan inpuahchah tawh a, hnehna chan ngei tumin kan kal ang. Chak lo ila, Barcelona lo chak lo bawk si se kan ui dawn lutuk, chuvangin kan tana inchhirna tur engmah thlen tir kan tum lo," tiin champion a la inbeisei hle.

Real players zingah rawlthar forward Lucas Vazquez inhliam mah se league goal 33 khungtu Cristiano Ronaldo leh goal 24 khung tawh Karim Benzema-te an la awm cheu avangin Real an talbuai lo ang.

Khawvela player man to ber Gareth Bale chu a khup hliam la dam lo mah se a inlan beisei a ni a, Welsh winger hian tun season La Liga match 22 a inlanah goal 19 a khung tawh.

Vawi khat chak

La Liga champion beisei Barcelona leh Real Madrid-ah Catalan club dinhmun a duhawm zawk. Zanin dar 8:30-a Granada an hmachhawn hunah Barcelona hian hnehna an chang a nih chuan an club chanchina a vawi 24 nan league nomawi an chawi ang.

Mahse, Barcelona tan chuti maiin nomawi chawi a awlsam dawn lo. Granada winger Isaac Cuenca chuan Barcelona nomawi chawi beiseina tih tawp an tum tur thu a sawi a, an zam lo.

Barcelona tana lo khel tawh winger chuan, "Granada tan ka khelh avangin Catalan lama ka ṭhiante ngaihtuah thei ka ni lo. Chakna goal ka khung thei a nih chuan ka lawm khawp ang, Barcelona-a ka ṭhiante pawhin min lawmpui ngei ka beisei," tiin Catalonia chhuak tlangval chuan a pianna ram aiin a club khelhna a ngaihpawimawh zawk thu a sawi.

Mahse, Granada tan an mikhual tur hi Barcelona an nih miau avangin a awlsam dawn lo. Chelsea winger Eden Hazard-a'n a league match hnuhnung paliah goal li a khung a, British media ten Belgian winger harhtharna chang mek hi hahipin an fak - Catalan club tan Luis Suarez chuan a league match hnuhnung paliah goal 11 a khung a, Uruguayan striker ropuina hi Eden Hazard 'harhtharna' nen khaikhin la, a ropui zia i hmu ang.

Barca ropuina

Barcelona ropuina ti fam-kimtu chu MSN tia hminglem an vuah sak Lionel Messi, Luis Suarez leh Neymar-te hi an ni. Tun season bikah Suarez a langsar ber a, Liverpool striker hlui hi La Liga top scorer a nih ngei a rinawm.

Suarez hian league match 34 a inlan tawhah goal 37 a khung a, tun season inelna hrang hrangah vawi 51 inlanin goal 56 a khung tawh. Hliam vanga a talbuai chungin Lionel Messi-a'n league match 32 a inlanah goal 26 a khung tawh a, inelna hrang hrangah vawi 47 inlanin goal 41 a khung tawh bawk.

MSN zinga goal khung tlem ber Neymar-a'n league match 33 a khelhah goal 24 a khung a, inelna hrang hrangah vawi 47 inlanin goal 30 a khung tawh thung.