Serena Williams inlar leh ṭan ta

Nikum Wimbledon hnuah Grand Slam nomawi la chawi leh lo mah se Serena Williams chuan tun thla tawp lama khelh tur French Open-ah champion a tum ngam tih a lan tir leh ta. World number 1 hian Christina McHale hnehin Italian Open quarterfinal a inhlangkai.

Ningania inkhelah American chhuan-vawr Serena hian a hnampui McHale chu 7-6, 6-1 in a hneh a, semifinal lut tur chuan seeded pakuana Svetlana Kuznetsova a paltlang leh a ngai dawn.

Inkhel dangah Kuznetsova chuan Daria Gavrilova lakah 6-2, 2-6, 6-3 in hnehna a lo chang ve bawk a, Misaki Doi, Irina-Camelia Begu, Timea Bacsinszky, Garbine Muguruza, Barbora Strycova leh Madison Keys te pawhin quarterfinal an lut ve bawk.