Pathianni zanah Premier League a tawp dawn

Pathianni zan dar 7:30-ah Pre­mier League club-te an inlan kim vek dawn a, tun season atana an league match hnuhnung ber tur a ni ang.

Season tawp a thlen hmain Pre­mier League-ah Leicester City an champion chiang tawh a, Aston Villa, Newcastle United leh Norwich City-te Championship lamah an tlak thlak tawh bawk avangin Champions League khelh beisei Manchester United leh Manchester City inlan tur hi inkhel ngaihven hlawh ber tur chu a ni.

UCL beisei United

Manchester City-in Arsenal an inhnehtawkpui hnuah Manchester United tan season thara Champions League khelh an kutah a innghat tawh a, mah se Louis Van Gaal-a naute hian West Ham an hneh loh ve leh avangin an khaw club kutah an innghat leh ta.

United hian zaninah Bourne­mouth an hmachhawn dawn a, season thara Champions League khel tur chuan hnehna an chan bakah Swansea City khelmualah Manchester City an tlawm a ṭul ang - City hi an chak lo a nih chuan season tharah Pep Guardiola hoin Europa League-ah an lungawi a ṭul dawn tihna a ni a, City player-ten hei hi thlentir an duhin a rinawm loh.

Arsenal nge Spurs?

Arsenal-in season tin St.Totte­ring­ham's Day an lawm ṭhin a, he ni hi league-a an hmelma kumhlun Tottenham-in an umpha thei tawh lo tih an chian niah an lawm ṭhin. Arsenal-in Aston Villa an hmachhawn dawn a, Tottenham-in Newcastle United an lenchilh dawn thung.

Spurs-in Magpies lakah hnehna an chang lo a, Arsenal-in Villa an hneh a nih chuan Gunners hian pahnihna nichungin season an khar ang a, kum dang ang bawkin St.Totteringham's Day an lawm dawn tihna a ni. Mahse, Spurs-in season duhawm tak an hman kum lehzelah St.Totteringham's Day hi an thlentir duhin ring suh.

Champion Foxes

Kum 2004-ah Chelsea-in coach Claudio Ranieri an ban a, kum 12 a liam meuh chuan Blues hian Premier League champion Leicester City coach Ranieri hi zahna lantir chungin Stamford Bridge-ah an lo dawng sawng dawn.

Pathianni zana Foxes mikhual tur Chelsea manager Guus Hiddink chuan he thu hi tichiangin, "Leicester City hian hlauthawnna nei miah lo leh thinlung pe tak chungin football an khel a, league nomawi an chawi a ni. Stamford Bridge-a kan mikhual hunah anmahni zahna kan lantir dawn a, hei hi an phu a ni," tiin an khingpui tur team a fak.

Season liam ta champion Blues-in champion thar Leicester City chu guard of honour an pe dawn. Foxes
ṭantu tan hun chhinchhiahtlak a ni ang.