Bayern Munich-in nomawi chawi dawn

Zanin dar 7:30 hian Bayern Minuch chuan Pep Guardiola kaihhruaina hnuaia an Bundesliga match hnuhnung ber tur chu Allianz Arena-ah Hannover nen an khel dawn a, inkhelh banah Bayern hian league nomawi an chawi ang.

Bayern Munich hian kar hmasa khan Ingolstadt hnehin Bundesliga champion an ni chiang tawh a, Barcelona coach hlui Guardiola-a'n Germany-ah kum thum hun a hman chhungin a team-te hi league-ah a champion pui vek.

League table mawngphaha awm Han-nover tan beisei tur a awm tawh lo a, Bayern hian tun hnai season kaw chhungin Allianz Arena-a an match hnuhnung berah hnehna an la chan ziah avangin a ṭum 10 nan an chak leh ngei tura ngaih a ni.

Bayern midfielder Arturo Vidal, Xabi Alonso leh Arjen Robben te hliam a dam tawh a, zanin hian an inlan thei lo a nih pawhin German Cup final-ah chuan chhawr theih tawh tura ngaih an ni.

Thomas Tuchel-a nauten tun season Bundesliga-ah goal 80 khung tawhin anni aia khingpuite lama chhuih lut tam an awm lo. Dortmund-in season duhawm tak hmang mah se Bayern an tluk loh miau avangin pahnihna dinhmuna an lungawi a ṭul a, zanina Cologne nen an inkhelh tur pawh hian awmzia a nei thui lo. Captain Mats Hummels chuan season tharah an hmelma leh elpui ber Bayern a pan san dawn bawk avangin an season khar dan tur hi a lungchhiat thlak zawng pawhin a ngaihtuah theih.

Amaherawhchu, Dortmund hian beisei pakhat an la nei a, chu chu May 21 zana Bayern Munich nen an khelh tur German Cup final a ni. Nikum khan final-ah Dortmund hian Wolfsburg 3-1 in an hneh lo tawh a, kuminah erawh chetsual nawn an duh lo ang.

A la tawp lo?

Bundesliga team 18 aṭanga a sangzual paliin season tharah Champions League an khel dawn a, Bayern leh Borussia Dortmund bakah Bayer Leverkusen an tling chiang tawh. Table-a palina Monchengladbach hian point 52 neiin an dinhmun a ṭha tawh bawk a, mahse Mainz, Hertha BSC leh Schalke te aia an sanna chu point hnih chiah a ni. Amaherawhchu, Monchengladbach hian goal difference an neih ṭhat fal tawh em avangin an tling tura ngaih a ni thung.

Table mawng phah lamah Hannover chu 2. Bundesliga-ah an tla chiang tawh a, VfB Stuttgart, Werder Bremen leh Eintracht Frankfurt te chu tla thei dinhmunah an la ding bawk. Hoffenheim-in point 37 hmuin relegation zone chhuahsan fel tawh mah se an match hnuhnung berah Schalke lakah an chak lo a nih erawh chuan playoff khel thei dinhmunah an la ding thung.