2016 Fed Cup Semifinal 2nd Leg Mizo Champion Vs Goan Champion

Aizawl FC-in India ram pum huap nomawi chawi turin Sporting Clube de Goa an hneh a ṭul. Pathianni zan dar 7:00 hian Fatorda Stadium-ah Mizo champion leh Goan champion te final luh inchuhin an intawng dawn a, TEN 2-ah pekchhuah a ni ang.

Vawiin tlai dar 5:00 hian Federation Cup semifinal pakhat zawkah Mohun Bagan leh Shil-long Lajong te an inkhel bawk ang. Inkhel pawimawh tak ni mah se Mariners-in Barasat Stadium-ah goal nga laia hnehna an chan tawh avangin Lajong hi an thawhchhuah a rinawm tawh loh.

Sunday-ah Sunday

Joel Sunday-a'n I League
aṭangin Aizawl FC chhanhim zo lo mah se Federation Cup-ah erawh semifinal a hruai thleng. Nigerian striker hian Mizo club hi eng thleng nge a hruai dawn tih a hriat loh a, final thlenna kawng erawh a inhawng zau hle.

Chanmari FC striker hlui hian I League match kuaah goal li a khung a, Fed Cup-ah erawh match thum lekah goal thum a khung. RG Stadium-ah goal awm loa an inhnehtawk tawh avangin Aizawl FC hian chak turin goal khung an mamawh. Chuvangin Sunday-a khelh tur Fed Cup semifinal thawh hnihnaah hian Joel Sunday hi player pawimawh a ni.

Rowlin aiah Densil

Sporting Goa-in midfield-ah India tana khel pha Rowllin Borges an nei a, Goan midfielder hi RG Stadium-ah a inhliam a, Fatorda Stadium-ah a inlan dawn lo.

Goan champon hian feet ruk leh inches khata sang Borges tel lo hi an tuar ngei dawn a, amaherawhchu Densil Theobald a khel thei tawh dawn. 2006 FIFA World Cup-ah Trinidad and Tobago-in group stage an paltlang lo a, amaherawhchu an match zawng zawng khel thei Densil hi Fed Cup-ah chuan inkhel thlak danglam thei turin a ṭha tawk. Trinidadian midfielder hi inhliam vangin Aizawlah a rawn zin lo.

Goa-ah Aizawl FC

I League neih zawh takah khan Aizawl FC-in Goa-ah match hnih an khel a, Salgaocar leh Sporting Goa nen an inkhelh
ṭuma result chu 1-1 ve ve a ni.

Tun ṭumah hian Aizawl FC tan 1-1 hi a tawk a, Bengali coach Jahar Das chuan inkhelh ṭan phat aṭangin attacking football an khelh tur thu a sawi.

Aizawl FC hian RG Stadium-ah damchian loh vangin Albert Zohmingmawia chu bench-ah an ṭhuttir a, Goa-ah erawh inkhel bul a ṭan ang.

Jeje leh Goal

Fed Cup-ah Mohun Bagan striker Jeje Lalpekhlua'n hattrick a siam tawh a, goal ruk khungin top scorer a ni mek bawk. I League champion hian Shillong an tlawh hnuhnun ber ṭumin Lajong hi 2-2 in an draw a, Mariners tan Jeje leh Yusa Katsumi ten goal khat ve ve an khung a, mualneitu tan Brazilian striker Uilliams-a'n goal hnih a khung.

Lajong tan Mohun Bagan final kalkawng hi dal theih a ni tawh lo ni berin a lang a, zawhna awm zawk erawh Jeje-a'n goal a khung leh ang em? tih hi a ni.