Everton-in Martinez an ban

Kum thum an nghah hnuah Everton dawhtheihnain a tlin ta lo - an manager Roberto Martinez chu a hna aṭangin an ban. Premier League match khat khelh tur la nei Everton hi table-ah 12-na ni mekin FA Cup leh League Cup semifinal aṭanga hnawhchhuah an ni bawk.

Everton chuan thuchhuah siamin, "Roberto-a'n season thum kan hnena hun a hman chhunga a thawhrimna leh inpeknate avang khan kan lawm takzet a ni," tiin an manager ban tak chu an thlah.

Spanish manager hian kum 2013 nipui lai khan Manchester United pantu David Moyes thlakin Everton hi a zawm a, Merseyside club hi Champions League khelhpui ngei a tiam. Wigan boss hlui hian a season hmasa berah Everton hi pangana dinhmun luahpuiin point 72 a hmuhpui a, 1986-87 season-a Everton-in league nomawi an chawi hnua point an hmuh hnem ber ṭum a ni.

Mahse, Martinez hnuaiah Everton-in hma an sawn chhunzawm lo, a season hnuhnung pahniha league match-ah vawi 22 chiah a chak a, a season hmasa bera vawi 21 chak a neih nen a inzat thuak.

Kum 42-a upa manager thlak tur hian Ajax coach a nihna aṭanga bang hlim Frank De Boer sawi nghal a ni a, Dutch manager agent chuan Everton-in an dawr a nih chuan an ngaihtuah tur thu a sawi tawh.