Man City tan EPL nomawi a hnai takzet ta

Premier League champion ni turin Manchester City tan Arsenal ngaihchan a ngai lo - Pep Guardiola naute hian tun kar tawpah West Ham an hneh a nih chuan a zawn a vawi li nan EPL nomawi an chawi dawn.

Man City hian Thawhlehni zan khan Tottenham Hotspur chu 2-0 in an hneh. League match 37 aṭangin point 88 an hmu, pahnihna Gunners aiin point hnihin an sang - English football inelna sang bera champion zawn rei ber record siam turin Etihad Stadium a inbuatsaih nghal ang.

Spurs an chak loh chiah hian palina Aston Villa chu season thara Champions League khel turin an tling nghal. Man City, Arsenal, Liverpool leh Villa te hian European football inelna sang ber khel turin ticket an nei fel tawh a ni.

Boruak a nung

Inkhel ṭan hmain Tottenham manager Ange Postecoglou chuan chak tuma an khelh ngei tur thu a sawi a, mikhual team manager Pep Guardiola chuan point an hloh a nih chuan an tan Premier League nomawi chawi theih a nih loh tur thu a sawi thung.

Spurs ṭantu zingah Arsenal tan kawngsiaksak duh lo an tam zawk, inkhel an ṭan chiaha khelmual chhungah fans an aurual, "Arsenal i hua a nih chuan rawn ding chhuak rawh," tiin an au dual dual a, coach Postecoglou rilru nen chuan a inmil viau loin a rinawm.

Box chhung aṭangin Pierre-Emile Hojbjerg-a'n ball a pet chhuak sual a, lo dawng fuhtu Phil Foden chuan ball kang lai hi goal lamah a pet nghal, goalkeeper Guglielmo Vicario rawn tawlh hmain a ban phar chuan ball a dang fuh hlauh.

Spurs si ban nghaktu hian a hnu lawkah Kevin de Bruyne-a'n a kanga a shot hlauhawm tak chu a lo dansak leh hram. Belgian midfielder hian a ṭhiante ball dawn per chu laklawh nei miah lo pet ṭha hle mah se Vicario a lo che ṭha ve tlat.

A hunah Haaland

Goal a lut mai lo a - Tottenham tan UCL beiseina a la nun bakah Arsenal ṭantute tan EPL champion beiseina a la nung ve bawk; Guardiola naute erawh an chak hleihtheih lohna mualah an ke hmui tlat lo.

Minute 51-na a ni a, mual sirah Foden chuan chak zetin ball a tlanpui a, a cross erawh an lo chang fuh tawh lo. Bernardo Silva-a'n lo changin a hmaa awm De Bruyne atan a lir lut zui, ani hian striker Haaland tan nuamsa taka khung turin a siamsak zui.

A tir lamah Haaland a langsar tawk lo a, a hunah tak erawh striker dik tak a nihna a lang leh tlat; box chhunga a ball khawih fuh hmasak a khung chat a, season tir lamah hliam a neih bakah beisei angin khel ṭha tawk lo mah se a tawpah penalty a khung bawk.

Spurs lamin bei let viau mah se Son Heung-min, Pape Matar Sarr leh Brennan Johnson ten a tawp an thlang zo chiah lo a, goalkeeper Ederson tana hna hautak leh harsa tak an siam thei meuh lo a, a tawp dawnah an zuih leh mai ṭhin.

City damna Ortega

Tottenham Cristian Romero nen an intihpalh avangin Man City keeper Ederson thlak a ngai a, si ban nghak turin Stefan Ortega a lo lut. Ani hian hun tawp dawnah an lama goal lut tur chu ṭha lutukin a dang a, an theihnghilh ngai tawh lo ang.

Ortega hian amah ang bawka substitute Dejan Kulusevski khung tur vawi hnih a dansak a, chumi hnuah Son Heung-min nen chauha an inhmachhawn hnuah a dansak bawk - South Korean tlangval khung loh hi Spurs aiin Arsenal hoin an ui zawk hialin a rinawm.

Hun tawp dawnah Manuel Akanji tihsual vangin Son-a'n remchang a hmu a, chak lutuka ball luh puiin remchang ṭha lutuk nei mah se a shot hi Ortega chuan a ke in a lo dansak hram a, nomawi hlawhchhuahna 'save' tia sawi ngam hial a ni.

Ortega-a'n ball a lo dan lai hian khelmual sirah Guardiola chu a lo tlusawp hman hial, inkhelh banah Pep chuan, "Min chhanchim a ni, dang lo se la chuan Arsenal an champion ang. Stefan kha khawvel goalkeeper ṭha berte zinga mi a ni," tiin a keeeper a fak hle.

Spurs kan kehsawm - Postecoglou

Tottenham Hotspur manager Ange Postecoglou chuan Man-chester City laka an chak loh boruak chu hrehawm a tih thu a sawi a, inkhelh hma aṭang tawhin club dinna lungphung chu a kehchhia niin a sawi.

Chak ni se la chuan Spurs hian a tawp ni thlengin Champions League beiseina an la nei ang, hemi rual chaih hian chak emaw inhnehtawk emaw an nih chuan an hmelma Arsenal an champion theih nana kawng sialtu an ni thei thung.

Postecoglou chuan, "Inkhelh hma darkar 48 vel awmah khan club lungphung chu a kehsawm. Club chhung leh pawna, engkimah mai khan a fuh lo vek, tawnhriat mak leh danglam tak chu a ni," tiin Man City nen an inkhel chuan Gunners a zawm nasat thu a sawi.

Austrian manager Postecoglou chuan sawi zawmin, "Min ṭantute ngaihdan leh duh dan ka hre vek lo, an duh dan chu an sawiin an lantir thiang. Chutihrualin, a tawpah khan goal khung ni ila chuan fans puihna vanga khung kan ni tiin ka sawi ngam ang.

"Engtiangin nge an au a, eng thu nge an sawi ka ngaihtuah lo. He hmu kan pan chhan chu hlawtlinna chan duh vang a ni, midang ngaihdan leh sawi dan te, an ngaihsak leh thlir thlir dante hian min ti buai lem lo," a ti.