Lunglei club-in MPL an khel dawn

Mizoram Premier League Season 11 khel tur zawnna playoff-ah SYS FC-in MPL10 club khel thei Project Veng FC an hneh a, season tharah Mizorama football inelna sang ber an khel dawn. First leg-ah 2-2 in an inhnehtawk a, SYS FC tan home match a nih avangin second leg-ah chak ngei a ngai. Lunglei club hi an dinhmun chhe zawkah ngaih ni mah se coach Lalmuankima hote hian 5-0 in hnehna an chang a, aggregate-ah 7-2 in an chak.

Nimin inkhelah hian SYS FC an chungnung a, Lunglei club tan Mesak C. Lalrinngheta, Vanramnghaka, Andreas Lalhmingmuana leh H. Lalhumhima ten goal an khung a, Kolasib club-in a chhanletna an nei lo. MPL Qualifier aṭangin FC Bethlehem an inpettling a, SYS FC-in an hnung an zui. FCB hi civil club zinga relegate hnua inpetkai leh thei hmasa ber an ni a, SYS FC erawh an vawi khat khelhna tur a ni.

Danglamna penalty

Boruak a ṭha a, chawhnu lama inkhel ni mah se RG Stadium-ah ni a la sa ṭha. Inkhel ṭantirh lamah an inhnehtawk a, penalty shout vawi khat ve ve an nei a, pek an ni lo. Referee-in zahngaihna a lantir reng lo a, Project Vengin an phu angin penalty an hmu. Mahse, Kolasib club tana rawn pen chhuak Ricky Rohmingliana penalty pet chu keeper Joseph Laltluangpuia'n a dansak.

SYS erawhin an hun ṭha an bawhpelh ve lo a, minute 32-naah Mesak C. Lalrinngheta'n a penalty hlawhchhuah chu goal-ah a chantir. First half tawp hma chiahin SYS-in an khung belh leh a, Project Veng left back tihsual vanga inṭan ni mah se ṭha taka la luttu Ricky Vanlalhriatsanga fak loh theih a ni lo. Ricky-a'n a harsa zawng zawng a thawh zawh tawh hnuah a ball pek chu Vanlalramnghaka'n a ti goal.

Fitness-ah an inthlau

First half-ah SYS-in goal hnih an khung a, away goal rule an thai chhia a tih theih. Project Vengin goal hnih pawh rawn khung se, penalty shootout a ni tawh dawn a, away goal rule-in an tlawm thei tawh lo. Lunglei club an inringtawk sawt a, an fitness a ṭhat zawk avangin inkhelah an chungnung bawk.

Minute 63-naah Andreas Lalhmingmuana'n SYS goal thumna a khung a, Project Veng tan chak tur chuan goal li khung a ngai tawh. Coach Muankima hoten nuam sa takin football an khel tawh a, Project Veng an che thei lo. Minute 75-naah H. Lalhumhima'n a khung belh a, Andreas-a'n minute 87-naah SYS goal ngana a khung. Project Vengin a chhanletna a nei lo a, naupang rual awmkhawmna SYS 5-0 in an chak.

Hlawhtlinna chu

SYS coach Lalmuankima chuan, "MPL hi Mizoram chhunga inelna sang ber a ni a, hemi khel thei tura kan inpettling thei hi SYS Academy hlawhtlinna a ni. Hei aia hlawhtlinna sang a awm chuangin ka hre lo a, keini tan chuan chanchin lawmawm bik a ni," tiin Vanglaini a hrilh a, naupangte thawhrimna leh SYS hotutute ṭawiawmnaah lawmthu sawi bawk.

Lunglei club-in MPL3-a Lunglei FC an inlan hnuah club an nei leh dawn a, SYS FC-in Mizoram khawpui Aizawlah Leitlangpui hmel tihmawi an tum dawn. Chutihrualin MPL hi Mizo player ṭha rual awm khawmna a nih avangin naupang rual tan chuan a harsa dawn. Mahse, hei tak hi SYS Academy fiahna tur a ni a, MPL11 tingaihnawmtu an ni thei ang.