Aizawl an champion

MFA Inter District Senior Women Football Championship-ah Aizawl an champion. Nimin tlai khan Serchhip Sports Complex-ah final khelh a ni a, Aizawlin C. Zairemmawii leh Lalrinmuani te goal hmangin 2-0 in hnehna an chang.

Final-a goal hmahruai khungtu C. Zairemmawii chu player of the match-ah thlan a ni a, goal hnuhnung zawk khungtu Rinmuani'n tun inelnaah goal kua khungin top scorer a ni. Aizawl midfielder Cindy Remruatpuii Colney chu best player a thlan a ni a, Armed Veng tleirawl hi India junior team tan pawha khel tawh a ni.

Aizawl hian final lut turin harsatna tawk lo mah se final-a an hmachahwn erawh champion lai Saitual an ni a, an tawh a khirh hle. Saitualin goal chance an nei hmasa a, an khung lo. Aizawl erawhin an hun ṭha neih an hlah ve lo a, Zairemmawii'n minute 12-naah awmna tur taka awm rah sengin goal hmahruai a khung.

Second half-ah goal hmaa Rinmuani hriamzia hmuhin a awm a, minute 59-naah Zairemmawii ball pek chu box pawn aṭangin Rinmuani'n a lalut thut a, goal kilah 'cool' takin a khung. Aizawl tlarhnung a khawng ṭha a, goal an chhuah lo. Coach Lizzy Lalhmingsangi hoin Aizawlin 2-0 in hnehna an chang a, Inter Dist Women Football C'ship-ah an champion.