Mizoram dinhmun a chiang dawn

Swami Vivekananda U-20 Men's National Football Championship-ah Mizoramin tukin zing dar 7:30 hian Rajasthan an hmachhawn dawn. Group F inkhel dangah Maharashtra leh Meghalaya te an inkhel bawk ang. Group khat aṭangin pakhat chauhin quarterfinal an lut dawn a, Maharashtra chiahin beisei tur an nei tawh lo.

Mizoram tan quarterfinal lut turin draw a tawk. Inelnaah hian head to head en tur a ni a, Mizoram hi chak lo pawh ni se, Meghalaya-in Maharashtra an hneh theih chuan quaterfinal an lut tho ang.

Chiang zawkin

India ram pum huap kum 20 hnuai lam inelna hi phase liah ṭhen a ni a, group E leh group C te chuan April 12, Zirtawpni khan an khel ṭan daih tawh. Group C-ah Karnataka chu pakhatna an ni a, group E aṭangin West Bengal-in quarterfinal an lut thung.

April 19, Zirtawpni khan quarterfinal hi khelh a ni a, Karantaka-in Saikhom Borish Singh goal hmangin West Bengal 1-0 in an hneh. April 21, Pathianniah phase 2 ṭan leh a ni a, group A leh group H ten an khel ṭan.

Group A-ah Manipur chu pakhatna an ni a, group H-ah Telangana chu pakhatna an ni thung. Manipur hian quarterfinal-ah Telangana hi 4-1 in an sawp. Semifinal-ah Manipur leh Karnataka te hi an inhmachhawn ang.

Pahse 3 hi May 2, Ningani aṭangin khelh ṭan a ni a, group B aṭangin Delhi chu pakhatna an ni a, group D aṭangin Kerala an tling ve bawk. May 9, Ningani khan quarterfinal khelh a ni a, Delhi leh Kerala te hi hun pangngaiah 3-3 in an inhnehtawk. Penalty shootout-ah Delhi hi 4-1 in an vannei ta zawk.

Phase 4 hi May 11, Inrinni aṭangin khelh ṭan a ni a, group G-ah Assam, Tripura, Arunachal Pradesh leh Madhya Pradesh te an aw. NorthEast state pathum ngawt awmnaah Assam an che ṭha ber a, nimin khan Arunachal Pradesh 2-0 a hnehin quarterfinal an lut. Assam hian quarterfinal-ah Mizoram awmna group-a ti ṭha ber an hmachhawn dawn a, heta chak zawk hian semifinal-ah Delhi an hmachhawn ang.

Mizoram an inpeih

Mizoramin Maharashtra 3-2 a an hneh ṭumin goalkeeper H. Lalrinzuala inhliam vangin thlak a ngai a, a aiah Lalhruaitluanga a rawn lut. Hruaia hi Meghalaya 5-0 a an hneh ṭuma bul ṭantu kha a ni a, group match tawp berah bul a ṭan ang.

Goalkeeper Rinzuala chauh a inhliam a, player dang an dam ṭha. Mizoramin match hnih an khelh tawhah captain Lalthankima chu man of the match-ah thlan a ni ve ve a, Ainawn rawlthar Thathana hi mual dinglamah a awm leh ang.

Santosh Trophy-ah Thathana hi mual dinglamah a awm a, vei lamah Sawma Tlangte a awm. Zotlang rawlthar hi Maharashtra lakah an awltir a, bench aṭanga rawn lutin chakna goal a khung avangin mual vei lamah a rawn awm leh ang.

Midfield-ah Mizoram jersey no. 10 Lalngaihsaka chu game siamtu tur a ni a, Lalremtluanga (Mamatea) a hmuhnawm ṭhin bawk. Tukinah erawh Marcus Malsawmzuala aiah bench aṭanga lut Emanuel Lalhruaizela a luh a rinawm zawk.

Tlarhma lamah pawh MPL10-a Mizoram Police champion puitu zinga mi Lalrothlanga'n bul a rawn ṭan leh tawh a rinawm a, tlarhnung lamah mual vei lama ding turin Gilbert Lalbiaksanga a rawn kir a rinawm bawk.

Mizoram coach HC Zarzoliana chuan, "Draw-in quarterfinal a luh theih a, mahse draw kan tum lo - chak kan tum. Kan naute kan ringtawk a, inkhel turin an inpeih/ Maharashtra kan hneh ṭuma kan tihsualte Rajasthan lakah siam ṭhat kan tum a, champion tuma zin chhuak kan nih avangin hmasawn zel kan mamawh a ni," tiin Vanglaini a hrilh.

Swami Vivekananda U-20 Men's National Football Championship-a inkhel zawng zawng hi Indian Football YouTube Channel-ah en theih a ni.