MPL U17 - Chetsual a thiang tawh lo!

Mizoram Premier League Under 17 chu vawiin hian Lammualah round 6 khelh a ni dawn a, team tinin match hnih chauh khelh tur an neih tawh avangin inkhel a pawimawh tawh hle. Final khel turin Chanmari FC dinhmun a ṭha a; FC Venghnuai, Electric Veng leh Aizawl FC ten hmun ruak dang pakhat an inchuhah a ngaih theih.

Chanmari FC hian chawhma dar 11:45-ah Mizoram Police an hmachhawn dawn a, Police hian chhiarkawp danin final lut theihna tlem la nei mah se a tak ramah chuan beisei ngam chi a ni tawh lo. Rochhingpuia hoten match khat khelh hmabak nei chungin final ticket an nei thei ang.

Chawhnu dar 1:30-ah Aizawl FC leh FC Venghnuai an inkhel dawn a, AFC hian hnehna an chang a nih chuan Venghnuai point hmuh zat point 12 an hmu ve thei ang. Chutihrualin Aizawl FC hi an chak zo lo a nih chuan final luh theihna kawng a pingah a ngaih theih thung.

Match tawp berah Electric Vengin Project Veng an hmachhawn dawn a, EFC tan chak ngei a ṭul. Chutihrualin Electric Veng hian match tawp berah hmahruai mektu Chanmari an hmachhawn dawn a, hmabak a la harsa hle.