A vawi khat nana Champions League khel tur Villa
Aston Villa chuan an club chanchina a vawi khat nan Champions League an khel dawn - Thawhlehni zan khan Villa hnaih bertu Tottenham Hotspur chuan 2-0 in Manchester City an ngam lo a, Villa an um phak theih tawh loh avangin Unai Emery naute hi Champions League khel turin an tling.
Villa hian tun hmaa European Cup kha chu an lo khel ve tawh ṭhin a, mahse, 1991-92 season aṭanga Champions League tih a nih hnuah erawh an la khel ngai lo. 'Big Six' hminglem an pek English football awptu club lian karah Champions League khel turin an inpetkai - an hnathawh hi a nep lo.
Aston Villa hian European Cup bikah 1981-82 season khan champion nomawi an lo chawi tawh a, 1982-83 season-ah khel lehin, hemi hnuah erawh European football-a club inelna sang ber hrim hrim an la khel ngai lo a, chenna ngai loh ram fang turin an inpettling ta.
English top flight league-a vawi sarih champion tawh Villa hi Premier League-ah 1992-93 season khan pahnihna niin, 1995-96 season khan palina an ni bawk a, mahse, hetihlai hian champion team bak chu Champions League khel turin an tling ngai lo.
Hun lawmawm bik
Villa hian Thawhlehni zan khan Villa Park-ah club award semin hun an hmang a, Spurs leh City inkhel result an ngaichang reng bawk - Spurs tlawm thu an hria a, Villa player leh coaching staff te chuan Premier League-a palina an nih hi nasa takin an lawm.
Aston Villa boss Emery chuan, "Ni danglam bik a ni a, kan duhthusam a thleng dik ta. Tun hun thleng tur hian season ṭantir aṭangin kan bei a, player inhliamte nei ve bawk ṭhin mah ila, kan tumah kan chiang tlat.
"A hlimawm takzet a, Champions League khelh phak hi chu a hlu a ni," a ti - Villa hian league match 37 an khelh tawhah vawi 20 hnehna an chang a, vawi riat draw neiin, vawi kua an tlawm a, Pathianni zan dar 8:30-ah tun season-a an league match tawp ber khel turin Crystal Palace an lenchilh ang.
Villa fan ruhkawl, Prince of Wales William pawhin a club lawmpuina thu social media-ah pholangin, "Champions League kan khel dawn ta, season hriat reng tawh tur a ni ang. Unai, squad pumpui leh Villa-a mi zawng zawngte hnenah lawmthu ka sawi a, season thar a nghahhlelhawm ta hle mai," a ti.
Fak tlak Emery
Villa-in season tharah Champions League an khelh dawn vanga fak tur an awm a nih chuan Unai Eemry tluka fak phu an awm lo - Spanish manager hian October 2022 khan Villa hi a enkawl ṭan a, hetihlai hian Premier League table-ah 14-na an ni a, relegation zone an tlansanna chu point thum chauh a ni.
2018-19 season-ah khan Villa hi Championship lamah an awm a, playoff kaltlangin Premier League an inpetkai. English top flight league-a an let leh hnuah 17-na, 11-na, 14-na leh 7-nain season an khar a, 2023-24 season a herchhuah meuh chuan palina ni chungin season an khar dawn ta.
Arsenal pawh lo enkawl tawhtu Emery-a'n Villa a enkawl hnuah Manchester City, Liverpool leh Arsenal chiah Premier League-a point hmuh tam lamah an phak lo a, tun hi Champions League-a club paruk a enkawlna tur chiah a ni.
Villa hma hian Valencia, Spartak Moscow, Sevilla, Paris St-Germain leh Villarreal chu Champions League-ah hian a lo kaihruai tawh a, group stage-a tawp mai an tum lo ang.