Hlimen hnehin Tuichangral an tlang

Tuichangral chuan Ather Pro Volleyball League 2024 semifinal an lut. Thawhlehni zan LPS Arena, Falkland-a inkhelah Tuichangral hian Hlimen chu 3-0 in an hneh a, table chung berah an awm.

Lalbiakmuana leh Saidingpuia Sailo te chu khaw chhak team tan an khel ṭha hle a, 25-20, 25-15, 25-17-a an chak theih nan an thawhhlawk hle - Tuichangral an chak avang hian Hunthar pawh semifinal khel turin an tling nghal bawk.

Tuichangral tan veikhawr Biakmuana'n ṭum 14 vaw tlain point nga a hloh a, a vawi khat nan Kuriz Player of the Match-a thlan a ni a, league kal mekah Khawhai tlangval Saitea chet ṭhat ber ni ve thungin set hnihna thlenga khel Sonu-a nen point 12 hmuin tum li ve ve an tisual a ni.

Pro Volleyball-a an tel hmasak berah Mizo hlangin Hlimenin fiahna an hmachhawn a, Mizo player langsar sa lakluh an nei lo bawk a, harsatna an tawk. Zolungmuana'n vawi riat hlap tlain point thum a hloh a, kai thar tan mimala che ṭha ber a nih laiin lehlam player nena khaikhinin an el pha lo.

Set khatnaah Biakmuana'n a vuak tlak rualin Tuichangralin 21-18-in hma an hruai a, Hlimen spiker PC Lalnuntluanga vuak an dansak leh hnuah 24-20-in an sang zui leh a, net chung aṭang bawkin Vanlalhnehpuia hlap an dang tla leh a ni.

Set hnihna aṭangin Tuichangralin an thunun hneh leh zual a, state pawn aṭanga an lakluh Sonu chuan a vaw tla hnem hle. Hlimen innghahna pawimawh Nuntluanga'n a hlap kai loh hnuah 24-15-in an sang a, Sonu chuan ṭha zetin a service a, an la thei lo.

Set thumna ṭan dawnah set hnihnaa awl Zomuansanga'n Sonu a thlak a, tihsual nei loin ṭum li a vaw tla. Saitea'n a hlap tlak rualin 19-12-in Tuichangral an sang a, player thlak kualin hmun chang tam lote tan hun ṭha an siamsak.

Hlimenin theihtawpin bei let mah se inelna sangah danglamna siam thei player an tlachham a, hlap tlak leh lehlam vuak dansak kawngah Tuichangral leh an khelhpui tawhte an pha lo zel a; point 17 chiah an hmu ve hman tihin lehlam an tlang.

Durtlang North an hneh lo ṭumin Hlimenin set khat an la ve a, Hunthar hmaah tun ang bawk hian set hnaih zo loin an tlawm a, Nuntluanga'n point riat a hmuh zat a hloh a, Joseph Lalbiaksanga'n ṭum khat chiah tisualin vawi ruk hlap tla mah se awmzia a nei tham lo a ni.

Nuam ti takin Tuichangralin an khel ve thung a, Zomuana'n point riat hmuin ṭum hnih a tisual a, Vanlalṭanpuia'n point khat hlohin vawi sarih a hlap tla bawk a; khelh liah vawi thum an chakna niin point khatin anni aia vawi khata khel tlem Hunthar an lehpel.

May 18, Inrinni zanah Tuichangralin league khar nan Hunthar an hmachhawn dawn a, table-a sang ber chin felna a ni nghal ang. A mawngah Hlimen awm mah se an la tla lo.

May 17, Zirtawpni zanah Thutak Nunpuitu Team nen an inkhel ang a, May 20 zanah league zawh nan Chhinga Veng Spikers nen an intawng dawn a ni.