Referee be turin captain chauh

UEFA chuan Euro 2024-a tel tur team-te hnenah inkhelh laia referee be turin captain chauh an remtih thu an hrilh a, tilui an awm a nih chuan yellow card pek theihna a ni ang.

European football-a thuneitu sang berin hetiang thutlukna a siam chhan hi, player-ten referee an bawr ṭhin hian football hmel a timawi loa an ngaih vang a ni.

UEFA managing director of refereeing Roberto Rosetti chuan, "Team zawng zawng hnenah captain chauh dawr turin player-te kan hrilh. Captain-te chu an teammate-te thunun turin kan hriatir a, referee hual a rem loh thu chiang taka hrilh an ni," tiin a sawi.

Rosetti chuan sawi chhunzawmin, "Captain thu zawm lo a, mahni thua referee hmachhawn lui an awm chuan yellow card pek an ni ang. Captain hi goalkeeper an nih erawh chuan outfield player zingah an aiawh tur ruat sa tur a ni," tiin thil thleng thei tur an dawn thui hle.

Euro 2024 hi June 14, Zirtawpni aṭangin khelh ṭan a ni dawn a, match hmasa berah inelna thlengtu Germany leh Scotland te an inhmachhawn ang.