Real-in Alaves an sawp

La Liga champion Real Madrid chuan 5-0 ngawtin Deportivo Alaves an sawp a, Vinicius Junior chuan goal hnih khungin, Jude Bellingham, Federico Valverde leh Turkish rawlthar Arda Guler ten goal khat ṭheuh an khung ve bawk.

Real boss Carlo Ancelotti-a'n hliam damkawr Thibaut Courtois chu inkhel bul a ṭantir a, Belgian keeper hi a che ṭha takzet - Courtois awm loh hlanin Andriy Lunin a lo che ṭha ṭhin a, Ancelotti-a'n Champions League final-ah tu zawk nge a chhawr dawn, hriatthiam a har ta hle.

Madrid khaw club hian league nomawi an chawi dawn tawh tih a chian bakah Champions League final an khel dawn a, June 1, zan dar 12:30-ah Borussia Dortmund nen European football roreltu nih an inchuh ang.

Ancelotti lawmna tizualtu tur chu a player langsarte an che ṭha chhunzawm zel hi a ni. Kum 20 mi Bellingham hian tun season inelna hrang hrangah match 40 khela goal 23 khungin, assist vawi 12 a nei bawk a, league-ah goal 19 khungin, goal khung tam lamah Girona striker Artem Dovbyk (20 goals) chiah a tluk lo mek.

Vinicius-a'n goal hnih a khung ve leh ta bawk a, Brazilian forward hian tun season inelna hrang hrangah match 37 khela goal 23 khungin, assist vawi 11 a nei tawh a, Champions League nomawi an chawi dawn chuan Bellingham nen an chet ṭhat chhunzawm a ṭul ang.

Hetihlai hian Girona chu Villarreal lakah 1-0 in an tlawm a, Bertrand Traoré chuan inkhela goal awmchhun a khung.