Djokovic-a'n Pablo Carreno Busta a hneh Semifinal-ah Nadal vs Schwartzman; Djokovic vs Tsitsipas

Novak Djokovic chuan Pablo Carreno Busta hnehin a vawi 10 nan French Open semifinal a lut, zanin hian final lut tur chinfel zui nghal a ni dawn. Rafael Nadal, Diego Schwartzman, Djokovic leh Stefanos Tsitsipas te chiah an dam tawh.

Nilaini zan quarterfinal inkhelah Djokovic hian Busta hi darkar thum leh minute 13 chhungin 4-6, 6-2, 6-3, 6-4 in a hneh a, inkhel dangah Tsitsipas chuan Andrey Rublev chu 7-5, 6-2, 6-3 a hnehin a vawi khat nan Paris khawpuiah semifinal a lut ve bawk.

Djokovic leh Busta intawn hnuhnung ber chu US Open kha a ni a, ni 31 chauh a ral hnuah French Open-ah an intawng leh. New York khawpuiah khan Novak hi line judge a vuak per avangin hnawl (disqualify) a ni.

Tun ṭuma an intawng leh pawh hian ngaihven a hlawh phah, world number 1 Djokovic hian a dar leh nghawngah hliam tenau nei chungin match a khel a, inkhel tir lamah enkawl ngai deuh mah se harsa lutuk loin match a khel tluan.

Darkar thum leh minute 13 an inkhelh hi kumin French Open bikah Djokovic-a'n match a khelh rei ber a la ni a, set a hlohna hmasa ber a ni bawk. Italian Open champion hi a khel a nghet ṭha tawk a, semifinal-ah pawh rinkai a ni ang.

Seeded pakhatna Djokovic chuan, "Training neih laiin hliam tenau ka nei a, harsatna min siamsak lutuk lo mah se awm chu a ti nuam lo deuh. Ka nghawng leh dar hi tun hma pawhin a na  tawh a, nasa tak a nih loh hram ka beisei," tiin a sawi.

Djokovic hian semifinal-ah Stefanos Tsitsipas a hmachhawn leh dawn, Greek tlangval hian Court Philippe Chatrier-ah a khingpui Rublev chu darkar khat leh minute 55 chhungin a lo hneh ve thung a, clay court inelna liana a tawn san ber ṭum a ni.

Kum 22 mi Tsitsipas chuan, "Inkhel tir lamah khan kan talbuai ve ve a, kawng dik zawh tuma theihtawp kan chhuah dun kha chu ropui ka ti hle. A tawpah erawh inkhel thunun chunga hnehna ka chang thei kha ka lawm, match lehpekah chuan tih sual neih tlem a pawimawh dawn," a ti.

Semifinal thlirzuiin Tsitsipas chuan, "Tun hmain Novak hi vawi hnih ka hneh tawh a, ṭum thum chu ka ngam lo thung. Tun season kal laia player ṭha ber hi ka hneh thei a ni tih lantir ka tum dawn," tiin a sawi a, world number 1 lakah erawh rinkai lo zawk a ni ang.

Djokovic-a'n kuminah match 36 a khel tawh a, vawi 35 a chak thei! A chak loh awmchhun pawh US Open aṭanga an hnawl ṭum kha a ni a, French Open inbuatsaihna Italian Open title a lak avangin Paris khawpuiah pawh rinkai a ni.

Tennis player zingah chuan Diego Schwartzman hi 'pa te' a ni a, 5 ft 7 in a sang player hi Mizo zingah chuan pa vantlang zinga mi tur ni mah se a elpui dangte an len hlawm avangin a hniam fal deuh hle.

Schwartzman hian zanin dar 9:00-ah Rafael Nadal a hmachhawn dawn, a chak a nih chuan French Open final a lut ang. Italian Open quarterfinal-ah Nadal hi a lo hneh tawh a, tun ṭumah pawh hian Dominic Thiem hneh thei a nih avangin dah hniam theih a ni lo.

Argentine tlangval chuan, "Pa lian leh sang deuh chu ni ila service kawngah min pui ang, service mai bakah ka ball vuak pawh a na zawk hle ang. Mahse John Isner leh Ivo Karlovic te ang tiat ka ni ngawt thei si lo a ni.

"Tennis court chhunga ka luh tawh chuan eng tiat nge ka nih ka ngaihtuah tawh ngai lo, ka hmaa ding player chu eng tiat nge tih chhut pawh a pawimawh ber lo. Ka khingpui ka hneh theih dan tur chauh ka rilruah a awm tawh ṭhin," tiin a sawi. A hmachhawn tur Nadal hi 6 ft 1 in a sang a ni thung, inches ruk zetin an insan hleih.

Schwartzman hi Argentine sumdawng hausa fa a ni a, mahse an ram sorkar inrelbawlna fel lo vangin an dinhmun a tlahniam. A naupan lai chuan football a khel ṭhin a, a nu leh pa ten Barcelona leh Real Madrid jersey te an leisak ṭhin - a hnuah erawh tennis a khel ta zawk.

Nadal pawh a naupan laia football khel ṭhin a ni, a patea (uncle) Toni Nadal kaihhruainain tennis a khel ta zawk. Spanish star hi Real Madrid ṭantu a ni bawk, naupan laia football khel ṭhin pahnih hian tunah chuan tennis inelna sangah ropui zawk nih an inchuh dawn.