Bayern Munich kutah Bundesliga title

Pep Guardiola tana Bun-desliga match hnuhnung ber chu Inrinni zan khan khelh a ni a, Bayern Munich chuan an mikhual Hannover chu Robert Lewandowski goal khat leh Mario Gotze goal hnih hmangin 3-1 a hnehin inkhelh banah league title an dawng.

Allianz Arena-ah inkhelh ṭan hmain Guardiola hnenah thlahna thilpek hlan a ni a, Spanish manager hian German-ah season thum hun a hman chhunhgin Bayern chu league-ah a champion pui vek a, match 102 a khelh pui aṭangin vawi 82 hnehna changin Bundesliga-ah 80.2% chak record a nei!

League match hnuhnung bera goal khat khungtu Le-wan---dowski hian tun season Bundesliga-ah goal 30 zet a khung tling ta a, inelna hrang hrangah goal 42 zet khung bawkin inkhelh banah top scorer trophy pek a ni bawk. Bundesliga chanchinah Cologne forward Dieter Muller-a'n 1976-77 season a goal 30 a khung tlin hnuah Poland international hi Bundesliga-a hetiang zat goal khung thei hmasa ber a ni.

Bayern nge nge

Bayern Munich hian match 34 khelh aṭangin point 88 an hmu thei a, anmahni hnaih bertu Borussia Dortmund-in an match hnuhnung berah Cologne 2-2 a an inhnehtawkpui vangin Guardiola naute hi point 10 zetin an sang fal ta a ni.

Tun hmain Bundesliga-ah a zawna vawi li champion thei an la awm ngai lo a, Bayern hian record thar siamin a zawnin league nomawi vawi li an chawi. Hei bakah hian tun hnai season 18 chhungin vawi 12 zet an champion thei a ni.

Bayern hian a zawnin legaue match 10 chhung hnehna an chang thei a, hneh loh nei loa kaltluang rei ber erawh Dortmund niin Thomas Tuchel a naute hi match 15 chhung zet tlawm loin an kaltlung.

Mangṭha Bayern

Kum 45-a upa Guardiola-a'n Barcelona chu champion theihna zawng zawngah a champion pui hnuah kum 2013 khan German champion a zawm a, season thum a hman zawh hnuah Premier League lama chona thar hmachhawn turin Manchester City a zawm dawn.

A kir leh tawh loh tur thu sawiin Guardiola chuan, "Ka lo kir ka ring tawh lo, Bayern hian level hran thleng leh tur chuan coach thar a mamawh tawh. Champion nomawi kan humhim thei hi kei leh player-te tan a lawmawmin duhthusam ang a ni e," tiin a sawi.

Europe-a a hlawhtlin loh vanga thupa chawi chhun-zawmin, "Champions League-a ka hlawhtlin loh vangin player leh fan-te chungah thupa ka chawi a, ka thinlung takin Carlo hian hlawhtlinna a thlen theih ngei ka beisei. He hmun hi Barcelona nen a inang lo em em, thil tam tak ka zir chhuah avangin tunhma zawng aiin hma ka sawn tawh zawk," tiin thil tam tak a zir tel thu asawi tel bawk.

Bayern tan season a la tawp vek lo a, May 21 hian Dortmund nen German Cup an la khel dawn. Guardiola hian German a a season hnuhnung berah nomawi pahnih chawi theihna hun a nei mek a ni.

A chung leh hnuai

Barcelona manager hlui Guardiola-a'n season thum chhungin Bayern hi Champions League semifinal-ah a tlak pui vek a, season tharah chuan Carlo Ancelotti kaihhruaina hnuaiah final luh an tum tawh ang.

Bayern bakah hian Dort-mund, Bayer Leverkusen leh Borussia Monchengladbach te chu Champions League khel tur hian an tling chiang a, Schalke, Mainz leh Hertha BSC ten Europa an khel thung ang.

Team 18 zinga point hmu hniam pahnih VfB Stuttgart leh Hannover 96 te chu an relegate a, 2. Bundesliga aṭangin SC Freiburg leh RB Leipzig te chu Bundesliga khel turin an tling thung. Hmunruak pakhat awm chu Eintracht Frankfurt leh MSV Duisburg ten playoff hmangin an inchuh dawn a ni.