Djokovic-a'n Nadal a dal leh ta

Rafael Nadal-a'n a inkhelh thiamna hmun clay court-ah pawh ngam loh a tawng chho ve ta zel mai. Zirtawpni khan Italian Open quarterfinal-ah world number 1 Novak Djokovic lakah 7-5, 7-6 in a chak lo.

Grand Slam vawi 14 champion tawh Nadal chuan, "Inkhel ropui tak a nih bakah entute tan pawh hmuhnawm tak a nih ngei ka ring. Inkhelh pawimawh bika chak loh hi chu pawm thiam a harsa ṭhin a, mahse Novak khan chak phu khawpin a khelh bakah ka vannei tawk lo deuh a ni," tiin a sawi.

Inrinni khan semifinal khelh chhunzawm niin Serbian thiampuipa Djokovic hian Kei Nishi-kori nen darkar thum chuang zet an inbeih hnu-ah 2-6, 6-4, 7-6 in hnehna a chang zui leh bawk. Semifinal lehlamah Britain number 1 Andy Murray chuan final lut turin harsatna a tawk lo a, seeded pawh chang phak lo Lucas Pouille chu 6-2, 6-1 in a hneh a ni.

Nizan khan Djokovic leh Murray te hi final-ah an inhmachhawn zui leh a, he thu buatsaih lai hian result kan hre hman lo. Kar hmasa Madrid Open final-ah khan player pahnihte hi an lo inhmachhawn tawh bawk a, Djokovic-a'n hnehna a chang.

Kumina Grand Slam tournament pahnihna tur French Open chu May 22 aṭang khian khelh ṭan a ni leh tawh dawn a, player tam tak tan Italian Open hi inbuatsaihna hnuhnung ber a ni tawh ang.