Juventus-in nomawi chawi ta

Italian Serie A-ah April thla khan Juventus an champion tih a chiang tawh a, mahse inkhelh hmabak an la neih avangin nomawi hlan nghal mai an ni lo.

Inrinni zan khan Juve hian Juventus Stadium, Turin-ah tun season-a an league match hnuhnung ber an khel a, Paulo Dybala goal hnih bakah Patrice Evra, Giorgio Chiellini leh Leonardo Bonucci te goal khat ṭheuh hmangin Sampdoria 5-0 in an sawp a, Serie A nomawi an chawi zui bawk.

Nikum October 31 kha chuan Juve hi table-ah a chanve hnuai lamah an awm a, mah se insiam ṭhain match 26 aṭanga point 76 hmuh belhin a zawna a vawi nga nan league-ah an champion thei a ni.

Juve hi nomawi pakhat chawi belh thei dinhmunah an la ding mek a, May 21 khian Stadio Olimpico-ah AC Milan nen Coppa Italia final an la khelh leh dawn a ni.

Italian manager Massimiliano Allegri chuan, "Ka ngaihdan chuan tun season-a kan kal dan hi chuan a kal nawn theih tawh lo ang. Season bul ṭan fuh loh khan zirlai tam tak min zirtir a, hei hian hriatreng tawh tur sulhnu min hnutchhiah tir a ni," tiin season ngaihnawm tak an hman chungchang a sawi.

Italian Serie A aṭang hian Juve bakah Napoli leh AS Roma te chuan season tharah Champions League an khel dawn a, Capri, Frosinone leh Hellas Verona te erawh an relegate thung. Serie B aṭangin Cagliari leh Crotone te chu Italy-a league sang ber Serie A khel turin an inpet tling thung.