Serie A goal khung hnem ber Higuain

Napoli-in Serie A nomawi chawi phak lo mah se striker Gonzalo Higuain erawhin a vanglai hmangin Inrinni zan khan Frosinone lakah hat-trick siamin a team chu 4-0 in a chak pui.

Argentine interna-tional hian tun season Serie A-ah match 35 a khelh aṭanga goal 36 khungin 1949-50 a Gunnar Nordahl record lo siam tawh goal 35 chu a rawn khum ta a ni.

Kum 28-a upa Higuain hian amah han hnai deuhtu a nei lo hle a, Juventus forward Paulo Dybala chuan match 34 a khelh aṭanga goal 19 khung vein an inthlauhna hi goal 17 zet a ni.

Season tharah Napoli hian Champions League an khel dawn chiang a, Roma chuan an match hnuhnung berhah AC Milan chu 3-1 a hnehin Champions League playoff an khel dawn bawk.

Napoli striker Higuain chuan, "He record siam theia ka awm hi ka lawm em em a, Napoli-a ka chenpui player leh staff-te bakah kan chhungte hnenah lawmthu ka sawi. Champions League kan khelh leh dawn tak avangin league-ah champion chiah lo mah ila lawm a hlim tur kan ni," tiin a sawi.