Mohun Bagan-in Fed Cup final an lut

Inrinni zan khan Shillong Lajong-in JN Stadium-ah goal awm loin Mohun Bagan draw mah se Barasat Stadium-ah Mariners hi 5-0 zeta an lo chak tawh avangin Kolkata club hian Federation Cup final an lut.

Guwahati-ah final

Federation Cup vawi 37-na final hi Indira Gandhi Stadium, Guwahati-ah May 21 zan dar 7:00 hian khelh a ni dawn. Kolkata club hian final-ah nizana inkhel Aizawl FC leh Sporting Clube de Goa chak zawk an hmachhawn ang.

Mohun Bagan hian kum 39-a upa inelna Fed Cup-ah hian tun ṭum hi vawi 19 final an luhna a ni a, vawi 13 an champion tawh. Mariners champion hnuhnun ber ṭum chu 2008 kha niin final-ah Dempo an hneh a, kum 2010 khan Bagan hian final thleng leh mah se an hmelma East Bengal lakah an tlawm.

Mizo Pali

Mohun Bagan hi final lut chiangah ngaih an ni tawh nachungin player langsar zingah hrem vanga khel thei lo midfielder Pronay Halder chiah an awltir - player pawimawh Cornell Glen, Yusa Katsumi, Sony Norde leh Jeje Lalpekhlua ten inkhel bul an ṭan vek.

Shillong Lajong-in Barasat Stadium-a an intawn hmasak
ṭum aṭangin Samuel Shadap leh Boithang Haokip te aiah full back Robin Gurung leh Zodingliana Ralte te inkhel bul an ṭantir a, Lajong tan Mizo pathum Adinga, Samuel Lalmuanpuia leh Isaac Vanmalsawma ten starting eleven an chang.

Hero - Samuel

Shillong Lajong-in goal an ma-mawh tam tih hriain ṭan phat aṭangin goal khung tumin an nawr a, goal chance neih erawh an harsat hle.

Lajong chance neih hmasak ber chu Konsham Chinglensana Singh-a'n yard ruk lek aṭangin a tauh over a, darkar chanve hnuah Samuel-a'n a chance ṭha neih chu goal zawnah a pet thei lo. Inkhelh banah Zemabawk North tlangval Samuel hi Hero of the Match-a thlan a ni a, I League-ah khan Mizo forwardhi Aizawl an hneh ṭumin man of the match-a thlan a ni tawh bawk.

Second half-ah Fed Cup match zawng zawnga goal la khung vek Bagan striker Jeje Lalpekhlua'n Sony Norde leh Yusa Katsumi te thawhrah chu a hmang ṭangkai thei lo. Jeje hian Bagan goal mamawh loh zanah goal khung lo mah se inelna neih mekah hian goal ruk khungin top scorer a ni mek.

Mohun Bagan-in Fed Cup 2016 match hmasa pathumah goal thum aia tlem lo khung zel mah se Shillong-ah goal khung aiin goal chhuah loh an thlang a, North East club zinga I League khel hmasa ber chu inkhel pahnih belhkhawmin 5-0 in an sawp.