Rahul Tripathi-a'n Kolkata chakpui
Indian Premier League-ah Nilaini zan khan Kolkata Knight Riders-in Chennai Super Kings chu run 10-in an hneh a, Jharkhand tlangval Rahul Tripathi-a'n run 81 siamin player of the match-ah thlan a ni.
Sheikh Zayed Stadium-ah Kolkata Knight Riders-in bat hmasak an thlang a, opener Tripathi-a'n ball 51 leka run 81 a siam zarah over 20-ah run 167 an siam a, an thi fai vek.
Super Kings tan target harsa tak niin lang lo mah se Mahendra Singh Dhoni captain-na hnuaia khel team hian over 20 chhungin an target hi an umpha hman lo a, run 157/5 an siam.
Dhoni hian ball 12-ah run 11 chiah a siam a, opener Shane Watson-a'n run 50 siam mah se tun inelnaa run 299 tehmeuh vaw chhuak tawh Faf du Plessis-a'n run 17 chauh a siam a. Chennai batsman dangte an chet ṭhat loh avangin Kolkata-in hnehna an chang.
Kolkata chakpuitu Tripathi hi kum 29 mi a ni a, ramchhung inelnaah chuan kum 2010 aṭang khan Maharashtra tan a khel. 2018-19 Ranji Trophy-ah Tripathi hian match riatah run 504 a siam a, amaherawhchu IPL-ah a chet ṭhat loh avangin Rajasthan Royals-in an chhuah a, 2020 IPL auction-ah Kolkata-in an lalut.
Kumin IPL-ah Tripathi hi vawi hnih a inlan a, run 81 a siam hma hian Delhi Capitals lakah run 36 a siam bawk avangin Kolkata hian la fuhah a ngaih theih a, chutihrualin hming a chher zel thei ang em tih erawh hunin a hril ang.
IPL khelh chhunzawm zel a ni a, zanin dar 7:30 hian Rajasthan Royals leh Delhi Capitals te an inkhel ang.
IPL - Thlirna Tawi
• Indian Premier League hi 2008 aṭanga khelh ṭan a ni.
• IPL hi vawi 12 neih a ni tawh a, team paruk an champion tawh. Chungte chu Mumbai Indians (2013, 2015, 2017, 2019), Chennai Super Kings (2010, 2011, 2018), Kolkata Knight Riders (2012, 2014), Rajasthan Royals (2008), Deccan Chargers (2009) leh Sunrisers Hyderabad (2016) te an ni.
• Kumin hi IPL vawi 13-na a ni a, team pariat Mumbai Indians, Delhi Capitals, Kolkata Knight Riders, Royal Challengers Bangalore, Chennai Super Kings, Sunrisers Hyderabad, Rajasthan Royals leh Kings XI Punjab te an inel.
• Vawi hnih ṭheuh an inkhel chhuak ang a, chuta a sang pali chuan Preliminary Round an thleng ang.
• Preliminary Round hi chi thum Qualifier 1, Eliminator leh Qualifier 2-ah ṭhen a ni. Qualifier 1-ah league-a pakhatna leh pahnihna an inkhel a, heta chak zawk hian final an lut nghal. Chutihrualin a chak lo zawk tan pawh final luh theih dan la awmin Qualifier 2 an khel leh ang.
• Eliminator-ah pathumna leh palina an inkhel ang a, a chak lo zawk an tla a, a chak zawkin Qualifier 2 an khel ang.
• Qualifier 2-ah hian Qualifier 1-a chak lo leh Eliminator-a chak an inkhel a, heta chak hian final an lut. Qualifier 1-a chak nen champion an zawng ang.
• Kumin league round hi November 3-ah khelh zawh a ni ang a, November 10-ah final khelh a ni ang. Hemi inkarah hian Preliminary Round khelh a ni ang.