Gujarat dan zawh loh Kohli & ABV

Inrinni tlai Indian Premier League inkhelah tun IPL-a batsman hmuh-nawm ber pahnih tih ngam Virat Kohli leh AB de Villiers-ten an theihna pholangin Gujarat Lions lakah Royal Challengers Bangalore chu hnehna an chanpui chiang hle.

M.Chinnaswamy Stadium, Benga-luru-a inkhelah bat hmasa zawk mualneitu team-in over 20 chhunga run 248 lai siamin mi pathum chiah an hloh a, ball 55 a hmachhawna run 109 vaw chhuaktu Virat Kohli leh ball 52-a hmachhawna run 129 hlaptu AB de Villiers-ten RCB tan an thawhhlawk takzet a, an hmuhnawm bawk.

Gujarat Lions tan run 249 siam chu huphurhawm tak a nih tawh laiin batsman-te an la che chhe zui a, over 18.4-a an vaia out vekin run 104 chiah an tlin a, an mikhualna ramah an mualpho chiang hle. Lions tana run siam hnem ber Aaron Finch chuan run 37 a tlin thei hram a ni.

RCB tan batsman-te chet ṭhat zanah bowler ho an awm mai mai bik lo a, Chris Jordan chuan over thum a vawmah run 11 chiah pein wicket li a la a, Yuzvendra Chahal chuan over liah wicket thum a la bawk.

Inrinni zan inkhel hnuhnung zawkah ruah sur vangin DL Method hman a ni a, Kolkata Knight Riders chuan wicket riatin Rising Pune Supergiants an hneh.

Pune hian over 17.4 thleng an bat hman tihin run 103 an siama, mi paruk an hloh. Kolkata-in over nga thleng chauh bat an hum a, run 66 siama mi pahnih hloh hmanin DL Method kaltlangin chak zawkah puan an ni. Kolkata tan ball 18 lek a hmachhawna run 37 siamtu Yusuf Pathan chu chhandamtu a ni.

Zirtawpni zan IPL inkhelah Mumbai Indians chuan wicket sarihin Kings XI Punjab an hneh zo lo. Mumbai hian over 20-ah run 124 siamin mi pakua an hloh a, Kings XI-in over 17 lekah an target umphain mi pathum chiah an hloh.

Zaninah inkhel pakhat chauh a awm dawn a, hnehna chang hlim Kolkata Knight Riders leh Royal Challengers Bangalore-te chu zan dar 8:00-ah an inhmachhawn ang.