La Liga-ah Barcelona an thiam ber

Barcelona ropuina sawi nep tum chu leihlawn tel loa inchung sang lawn tum ang chauh a ni ang - Catalan club hian season riat chhunga La Liga-a vawi ruk an champion-na ni turin Inrinni zan khan Granada chu 3-0 in an sawp a, goal thum hi Luis Suarez-a khung vek a ni.

Barcelona hian May 22-a Spanish Cup final-ah Sevilla an hneh a nih chuan season hnih chhung a zawnin league leh cup nomawi an chawi dawn tihna a ni a - record ropui tak a ni ang.

Inrinni zan league match khelh a nih hma hian Real Madrid pawhin champion beiseina an la nei a, Barca an chak loha anni lamin point thum an hmuh chuan La Liga nomawi an chawi daih thei. Mahse, Barcelona an tawlhthluk duh miau loh avangin Real tan khualmuala Deportivo La Coruna 2-0 a an hnehin awmzia a nei thui lo a, pahnihna dinhmunah an lungawi a ṭul.

Suarez a ropuina

Inrinni zan dar 8:30-ah cham-pion beisei Barcelona leh Real Madrid an inlan ve ve.

Minute 7-na lekah Real-in Cristiano Ronaldo hmanga goal an khung avangin goal la khung ve lo Barcelona fan-te thin phu a rang a - hetih lai hian inkhel tawp se champion tur chu Real Madrid an ni.

Mahse, minute 22-naah Suarez-a'n Barcelona fan-te hlauhthawn tihreh nan goal a khung a, Jordi Alba ball cross
aṭanga lo chhuih luttu Urugua-yan striker hian vengtu a nei lo.

Minute thum a liam a, inkhel lehlamah Ronaldo chuan Real tan goal hnihna a khung leh a - champion tuma team hran ve ve bitumtu Barca leh Real inumna a la tawp mai lo. Mahse, Barcelona tan Suarez bawk inlan lehin minute 38-naah an goal hnihna a khung ve leh a, Real-in goal dang an khung tawh lo thung.

Cristiano-a'n hat-trick siam a tumna kawngah woodwork vawi hnih lai a pet per laiin Suarez-a'n minute 86-naah a goal thumna a khung thung a, Barcelona tan league nomawi a hlawh chhuah bakah goal 40 khung chungin Trofeo Pichichi - La Liga golden boot dawng turin amah hnaih bertu Ronaldo a tlansan bawk.

A hun takah

April 2-a El Clasico khelh a nih hmain inelna hrang hrangah match 39 chhung Barcelona-in hneh loh an tawng tawh lo a, league-ah point kua laia sang falin Champions League-a champion beiseiawm ber an ni.

Mahse, Nou Camp-a Real laka 1-2 a an tlawm hnuah mak tak maiin Catalan club an tho leh lawk thei lo. Ni 15 chhungin Europe-ah beisei tur an nei lo a, league match thum chhung a zawna an tlawm avangin league-ah anmahni hnaih bertu Atletico aia head-to-head a an ṭhat vang chauhin hma an hruai bawk.

Amaherawhchu Barca an nih miau avangin Catalan club an mutthlu hlen lo - an league match hnuhnung panga-ah hnehna chang vekin goal 24 lawih an khung a, goal khat pawh an chhuah lo thung!

MSN bawk

Season tin deuhthaw Barce-lona player langsar ber ni ṭhin chu Lionel Messi a ni a, tun season-ah erawh Argentina captain aiin Luis Suarez a langsar zawk.

He ti chung hian Lionel Mes-si hi thai bo ngawt theih a ni lo. Hliam vanga ngai a awh lawk lo chungin Messi hian league-ah goal 26 a la khung tho a - season hmang ṭha an tih 'world class' striker tam zawk goal khung aiin a la tam tho. Hriat tel ṭul erawh Messi hna hi pet goal ringawt ni loin goal khung tura siam hna a thawk a, Argentina captain hian ṭhiante goal thun tur vawi 16 a siamsak.

Brazil captain Neymar chuan goal 24 a khung ve bawk a, tun season La Liga-a Barca goal khung zat 112-a goal 90 hi chu MSN tia hminglem an vuah sak Messi, Suarez leh Neymar-te khung a ni.

La Liga ṭan a nih aṭanga kum 75 chhungin Barcelona-in league nomawi vawi 16 an chawi hman a, Messi leh Andres Iniesta-ten Catalan club tan an khelh hnuah kum 2004-05 aṭanga ṭanin league-ah vawi riat an champion tawh.

Barcelona hian La Liga champion no-mawi vawi 24 zet an chawi tawh tihna a ni a, an nomawi hunna dawhkan a chep tawh khawp ang!

Suarez a lawm

Liverpool striker hlui Sua-rez-a'n tun season league match 35 a inlan aṭangin goal 40 a khung a, inelna hrang hrangah vawi 52 inlan tawhin goal 60 a khung tawh! Uruguayan striker hian a league match hnuhnung pangaah goal 14 a khung a, hei ringawt pawh hi striker pangngai tak season khat goal khung zat chu a ni hrim hrim.

Suarez hnaih bertu Ronaldo chuan league match 36-ah goal 35 khungin inelna hrang hranga vawi 47 a inlanah goal 51 a khung tawh bawk - Portugal captain hian season ruk chhung chu goal 50 a khung ziah a, record ropui a ni.

Kum sarih liam ta khan Atletico Madrid striker Diego Forlan chu La Liga top scorer a lo ni tawh a, hemi hnuah erawh Messi leh Ronaldo-in Pichichi chawimawina an indawn chhawk zak zak a, tunah Suarez a lo lang ta.

Mahse, Uruguayan striker chuan a hlawhtlinna chu a ṭhian-te vang a nih thu sawiin, "Ka thawhrim leh ṭhiante puihna avangin goal tam tak ka khung a ni. Ka ṭhianten ball min siam sak a, kei chu a khungtuah ka lo ṭang mai a ni. Top scorer nih hi a hlu a, mah se league nomawi chawi lo ila chu Pichichi lawmman dawn hian awmzia a nei lo ang," tiin a inngaitlawm hle.

Champion phu Barca

Real Madrid boss Zinedine Zidane chuan, "Kan vaiin kan hnual em em vek a, mah se league match 38 khelh tawh hnuah engmah kan thlak danglam thei lo. Barcelona hian league champion nih an phu a ni," tiin chhuanlam a zawng lo.

Zidane hian Real a enkawl hnuah match 26 kaihruaiin vawi 21 hnehna a chanpui a, an league match hnuhnung 12-ah hnehna an chang vek bawk.

Barcelona boss Luis Enrique chuan French legend ngaihdan hi a ṭawmpui a, a team chuan league nomawi chawi an phu ber thu a sawi.

Season hnih Barcelona a enkawl chhunga league nomawi chawi ve ve Enrique chuan, "Kan chet chhiat hnuah kan tho leh a, champion nih kan phu tih kan pholang a ni. Season tluanin kan khel ṭha em em a, team khel ṭha tluang berin league nomawi chu an chawi ṭhin," tiin nuam a ti hle.

Hmabak

May 28 zanah Real Madrid-in Champions League final an khel dawn a, Atletico Madrid nen Europe-a thiam ber nih inchuhin Madrid Derby an khel ang.

Barcelona pawh chawl hman an la ni bik lo. May 22 zan khian Sevilla nen Copa Del Rey final-ah an la inhmachhawn ve leh dawn a ni.