Fan chungah Abbiati a lawm

AC Milan goalkeeper Christian Abbiati chuan a match hnuhnung berah a beisei phak loh chawimawina a dawn thu a sawi chhuak.

Milan hian tun sea-son-a an match hnuhnung berah AS Roma an mikhual a, kum 38-a upa Abbiati aia lut chu kum 17-a upa Gianluigi Donnarumma niin San Siro-ah 3-1 in an chak lo.

Italian keeper Abbiati chuan, "Chak lo chunga hun tawp hman hi ka beisei dan chu a ni lo. Supporter-te khan an chungah ka lawm tih kan lantir hmain min hawsan ang tih ka hlau a, amaherawhchu dawhthei takin min nghak a, an chungah ka lawm takzet a ni," tiin fan-te chungah lawmthu a sawi.

Italy tan vawi li inlan tawh keeper chuan sawi chhunzawmin, "A ṭha ber ni si loin hun ka hmang rei tawh a, tunah chuan chawlh a ṭul ta a ni," tiin a ṭhat hun a liam tawh thu a sawi.

Abbiati hian kum 15 chhung Rossoneri jersey a ha a, loan-in Juventus, Torino leh Atletico Madrid tan a khel tawh bawk. AC Milan-ah hian first keeper ni ṭhin mah se season hnuhnung pahnihah erawh second keeper a ni a, league-ah vawi khat chiah inlanin knockout inelnaah vawi nga a inlan thung.