Ibrahimovic-a'n 'Zlatan' takin Ligue 1 a thlah

Zlatan Ibrahimovic chuan Paris-Saint Germain tana Ligue 1 match hnuhnung ber chu Inrinni zan khan a khel a, Nantes lamah goal hnih a khung.

Swedish pa dangdai tak hian goal leh record hmangin French league a thlah a, Ligue 1 a thlah dan hi Zlatan-a hun tawp hman dan tur renga mawi a ni!

Season tharah club dang a pan dawn a, PSG jersey hain vawi khat a la inlan ang - French champion PSG hian May 21 zanah Marseille nen French Cup final an khel ang.

Record siamtu

PSG hian Inrinni zanah Nantes 4-0 in an hneh a, goal hmasa ber leh goal hnuhnung ber khungtu chu Ibrahimovic a ni. Swedish striker goal hnih inkarah hian Lucas Moura leh Marquinhos te'n goal khat ve ve an khung.

Inkhelh laia inkhel entu mipuiin zahna entir nana standing ovation an pek hial Zlatan hian record a siam belh. 1977-78 season khan Carlos Bianchi-a'n PSG tan goal 37 a khung a, Zlatan hian goal 38 khungin kum 38 chhung record awm tawh chu a rawn khum.

Kum 34-a upa Sweden hian PSG tan match 179 khelin goal 154 a khung a, French club hi season tinin league-ah a champion pui vek bawk. Zlatan hi season tharah LA Galaxy zawm tura sawi a ni a, engmah a la sawi chiang duh lo.

Ibrahimovic chuan, "Season thara ka awm dan tur hi ka hre tawh a, mah se ka hrilh lo ang che u. Kum li chhung hun duhawm tak helai hmunah hian ka hmang a, ka khelh tawhnaah chuan nuam ka la tih berna niin a ngaihawm dawn khawp mai. French mipui tan ka theihna zawng zawng ka pe a, ka hnathawhah ka lungawi a, PSG hi ka theihngilh tawh ngai lo ang," tiin a hmalam a hun a sawi chiang duh lo.

PSG tana Zlatan-a record

Goal khung tam ber : 154

Season khata goal khung tam ber : 44 (2015-16)

Ligue 1 season khata goal khung tam ber : 38 (2015-16)

Ligue 1 bika goal khung tam ber : 109

UEFA hnuai inelnaa goal khung tam ber : 20

UCL khel tur

PSG-in match 38-ah point 96 an hmu a, anmahni hnaih bertu Lyon-in point 65 an hmu. Club pahnih hian season thara UEFA Champions League group stage khel turin an tling. Monaco-in point 65 hmuin pathumnaah an awm a, UCL qualifier an khel ang.

Palinaa awm Nice-in point 63 a hmu a, season tharah Europa League an khel dawn.

Ligue 1-ah Metz

Ligue 2-ah Nancy an champion a, Dijon leh Metz nen season tharah Ligue 1 an khel ang. Metz hi AIFF nen an inthlun zawm a, Bethlehem Veng rawlthar Jerry Lalrinzuala chuan French club-ah hian training a nei mek.

Ligue 1-ah hian club 20 an awm a, Reims, Gazelec Ajaccio leh Troyes te an division hnuai lamah an relegate thung.