Eriksen hoin Denmark chak

Inter Milan a pan hnua beisei phak lo Christian Eriksen chuan ram tan erawh hmun pawimawh a chan chhunzawm zel a, Nilaini zana Faroe Islands nen friendly match an khelhah penalty hmangin goal khat a khung - Denmark hian 4-0 in hnehna an chang. 

Danish coach Kasper Hjulmand enkawlna hnuaia khel Denmark tan hian kum 20 mi winger Andreas Skov Olsen chuan goal hmahruai a khung a, Eriksen-a'n penalty hmangin a chhunzawm. 

Belgian club Genk right back Joakim Maehle leh Parma striker Andreas Cornelius-te chuan goal khat ve ve an khung bawk a, Denmark hian first half chhungin goal li hi an khung vek. 

Luis Suarez chhuah hnua Barcelona jersey number 9 rochuntu Martin Braithwaite chu Denmark tan hian a inlan a, goal khung lo mah se Maehle goal khung hi a siamsak a ni. 

Denmark hian Pathianni zan dar 12:15-ah Iceland chu Nations League match an khelhpui dawn a, Faroe Islands hian Inrinni zan dar 9:30-ah Latvia an mikhual thung ang.