De Boer hnuaiah Netherlands chak lo nghal

Barcelona coach ni tura Ronald Koeman-a'n Netherlands a chhuahsan hnuah a hmun ruak luah turin Crystal Palace manager hlui Frank de Boer chu ruat a ni a, kum 50 mi coach enkawlna hnuaia an match hmasa berah Netherlands an tlawm nghal. 

Netherlands hian friendly match-ah Mexico an mikhual a, minute 60-naa Wolves striker Raul Jimenez-a penalty hmangin Mexico hian 1-0 in hnehna an chang. 

De Boer-a'n a player neih ṭhat a thawhchhuahpui chungin an khel a hmuhnawm lo a, sawiselna nasa tak kara lakluh coach enkawlna hnuaiah Netherlands hi beisei san an harsa hle. 

Netherlands hian Mexico lakah hian hun ṭha nei lo erawh an ni lo a, mahse Barcelona nena sawi zawm hlawh hman Memphis Depay chuan a hun ṭha neih chu crossbar tih per nan a hmang. 

September 23 a Netherlands coach ni tura lakluh De Boer hian Pathianni zan dar 9:30 inkhel tur atan a team a buatsaih lehnghal a ngai dawn a, Bosnia & Herzegovina nen Nations League match an khel ang. 

Mexico hian October 13 zanah Algeria mikhualin friendly match an khelh chhunzawm zui dawn thung.