Arsenal-in Spurs chungah season an khar

Premier League nomawi chawi hi Arsenal fan-te duhthu-sam a ni a, an hlauh tak pakhat erawh season tawpa Tottenham Hotspur hnuaia awm a ni thung. Pathianni zan khan league match khelh zawh niin Gunners fan-te lawma an aurual laiin Spurs
ṭantute mittui a luang thung.

League match hnuhnung berah Spurs hian Newcastle lak-ah point khat chauh pawh hlawhchhuak se pahnihna din-hmun an luah dawn a, mahse St James' Park-ah 5-1 in an mualpho.

Arsenal erawhin an mikhual Aston Villa chu 4-0 a sawpin point 71 an hlawh chhuak a, pahnihna dinhmun luahin Suprs aiin piont khatin an sang zawk. Gunners hian an hmelma lakah season 21 chhung a zawnin chungnung zawk dinhmun an luahna chiah a ni.

Giroud-a show

Emirates Stadium-ah Arse-nal-in inkhel bul ṭan aṭanga a tawp thlengin team ṭha leh chungnung zawk an nih zia an lantir a, striker Olivier Giroud chuan hat-trick (5', 78', 80') siamin Villa keeper Mark Bunn chuan anmahni lamah a ti lut palh bawk.

France international Giroud hian tun season-ah a club tan inelna hrang hrangah goal 24 khungin Premier League-ah bik goal 16 khungin assist ṭum ruk a nei bawk. Gunners chu kum 2005 hnua a vawi khat nan league-ah pahnihna nih puiin a zawna season 19 nan Champions League an khel leh dawn a ni.

Arsenal inkhel hi England manager Roy Hodgson chuan a hmunah a en a, forward Theo Walcott chu malpui na vangin a hmel hmuh tur awm lo mah se midfielder Jack Wilshere chuan a hliam a dam hnuah tun season-a a vawi khat nan inkhel bul a ṭan a, minute 69 chhung inlanin Euro khelh beiseina a nei zel.

Mittui chu

Season tawp ruala a contract tawp zui ve tur Spanish mid-fielder Mikel Arteta chuan Gunners tana a match hnuhnung ber a khel a, hun tawp dawnah goal bar pet perin Bunn-a'n anmahni lamah a tih luh phah nghe nghe. Kum 34-a upa Arteta hian 2011 khan Everton aṭangin Arsenal hi a zawm a, match 150 khelin FA Cup-ah
ṭum hnih a champion pui.

Kum 35-a upa Tomas Rosicky tan pawh Gunners tana a match hnuhnung ber a ni a, Czech Republic international hi khelmual chhungah inlan lo mah se inkhelh ṭan hmain chawimawina hlan a ni bawk.

Arsenal manager Arsene Wenger chuan, "Pakhatna nih hi kan duh leh tum ber a ni a, mahse pahnihnaah kan lungawi a ṭul. Season khat chhunga point 70 hmuh tlin hi thil awlsam a ni lo a, kan thlenchin hi a chhe hran lo," tiin a sawi.

A senior player pahnih chung-chang sawi zuiin, "Anni pahnih hi chu khelmual chhungah leh pawnah an player pui te zah an ni a, hruaitu ṭha leh entawk tlak an nih avangin an hnathawhte avangin an chungah lawmthu ka sawi a, an kal leh zelna turah duhsakna ka hlan e," tiin Arteta leh Rosicky te chungchang a sawi.

Beiseina thamral

English club hlun berte zinga mi Newcastle chu season tharah Championship lamah an awm ṭul dawn mah se tun season an league match hnuhnung berah inkhel ropui lantirin Georginio Wijnaldum leh Aleksandar Mitrovic-te goal hnih ve ve bakah Daryl Janmaat goal khat hmangin Tottenhman 5-1 in an sawp. Spurs goal neih chhun hi minute 60-naa Erik Lamela khung a ni.

Spurs striker Harry Kane-a'n tun season Premier League-ah goal 25 khungin golden boot a dawng a, English mi zingah Sunderland striker Kevin Phillips-a'n kum 2000-a goal 30 khunga golden boot a dawn hnuah hetiang dinhmun luah leh thei hmasa ber chu Kane hi a ni.

North London club pahnih Asenal leh Tottenham te hi engtik lai mahin an inngeih ngai lo a, 1995 season hnua a vawi khat nan Spurs hian an hmelma rap bet chunga season khar an tum ruh hle. Mahse, a tawp niah Rafael Benitez-a naute an ngam loh avangin North London rawng chu a 'sen' an tih leh rih a ngai dawn a ni.

Eng nge an sawi?

Newcastle manager Benitez chuan, "Ka thinlung chuan he hmuna cham chhunzawm zel hi a ṭha niin a hria a, mahse eng nge lo thleng tur chu ngaihtuah nawn a la ṭul," tiin a hmalam hun a chian loh thu a sawi.

Hun hrehawm a nih thu sawiin Spurs manager Mauricio Pochettino chuan, "Thil thleng hi hriatthiam a harin sawifiah thiam pawh a harsa hle. Heta
ṭang hian kan rilru puthmangah zir tur tam tak kan la neih zia a chiang viau. Khelmual chhung-ah rilru zawng zawng hman a
ṭul zia pawh kan zir chhuak tel chiang hle. Manager ka nih hnua ka hun tawn hrehawm berte zinga mi a ni," tiin Gunners lakah pahnihna dinhmun an hloh chungchang a sawi.