F1-a hnehna chang thei naupang ber Verstappen

Pathianni khan Formula 1 Spanish Grand Prix tlan a ni a, kum 18-a upa Max Verstappen chuan hnehna a chang. Red Bull driver Verstappen hi F1 inelnaa hnehna chang thei naupang ber a ni ta!

Catalunya-ah tun season-a roreltu Mer-cedes driver Nico Ros-berg leh a teammate Lewis Hamilton te chu lap khatna lekah intai palhin intlansiak an tlan tluan thei lo a, Ferrari driver Kimi Raikkonen chu pahnihah thlengin a teammate Sebastian Vettel chu pathumna a ni thung.

Tun thla tir khan Red Bull chuan an driver chhawr lai Daniil Kvyat thlak turin Verstappen an la lut a, an ti sual lo chiang hle. Dutch driver hian season hmasa khan kum 17 chauha upa ni chungin Formula 1 car khalh thei naupang ber nihna a lo hauh tawh bawk.

Tun season intlansiak panga awm tawh aṭang-in German driver Ros-berg-a'n point 100 hmuin hmahruitu a la nih chhunzawm zel a, Raikkonen chuan point 61 hmuin pahnihna dinhmun a rawn luah. Champion lai Hamilton chuan point 57 nei tawhin pathumnaah a la awm thung.

Formula 1 Spanish Grand Prix Results

1 Max Verstappen Red Bull

2 Kimi Raikkonen Ferrari

3 Sebastian Vettel Ferrari

4 Daniel Ricciardo Red Bull

5 Valtteri Bottas Williams

6 Carlos Sainz Jr Toro Rosso

7 Sergio Perez Force India

8 Felipe Massa Williams

9 Jenson Button McLaren

10 Daniil Kvyat Toro Rosso