Champions League khel tur Manchester City Stamford Bridge-ah ropui takin Ranieri a kir

Manchester United-in season thara Champions League khelh an beiseina chu a thamral ta - Pathianni zan khan Manchester City chuan 1-1 in Swansea City an inhnehtawkpui a, United Champions League beiseina an tihtawp sak nghal bawk.

United hian Pathianni zan khan an match tur chu venhimna lama buaina avang-in an khel thei lo a, paruknaah awm mekin Bournemouth nen an inkhelh hunah chak pawh nise palina City umpha tur chuan thil mak a thlen a ngai tawh - goal 19 tal an khung a ngai ang!

Premier League champion Leicester City-in khawvel league hausa bera champion an nih chhan an tarlang leh bawk a, Stamford Bridge-a guard of honour pek an nih zanah an boss Claudio Ranieri-a team hlui Chelsea chu khualmualah 1-1 in an inhnehtawkpui.

City tan Iheanacho

Swansea City-a inkhelah Man-chester City-in goal an khung hma a, Kelechi Iheanacho chuan City tana inkhel bul a ṭan hnuhnung pali aṭanga a goal ngana ni turin minute 5-na lekah goal hmahruai a khung. Kum 19-a upa rawlthar striker hian tun season-ah goal 14 a khung tawh a, Nigerian striker hian hmabak a nei êng hle.

Mahse, Liberty Stadium-a inkhelah Swansea-in tlawm mai an tum bik lo a, Liverpool tana a thlawna khelh a dil hnua Reds duh loh Andre Ayew chuan free kick
aṭangin Welsh club si phurh sutna goal a khung. Hun tawp thlenga goal dang a luh tawh loh avangin team pahnih hi 1-1 in an inhnehtawk.

Mangṭha Pellegrini

February thlaa Man-ches-ter City-in season thara an manager tur chu Pep Guardiola a nih thu an puan hma zawngin Manchester City-in league nomawi chawi beiseina an la nei a, mah se Spanish manager lokal tur thu puan a nih hnuah hmuh theihin City an tlahniam - point 66-a season kharin Sheikh Mansour-a'n kum 2008-a City a lei hnua Premier League-a point an hmuh tlem ber ṭum a ni.

Hetihrual hian Pelligrini-a'n City-a a hnathawh erawh sawi nep theih a ni lo, season thum a cham chhunga a League Cup pahnihna chu tun season-ah a chawi a, Champions League-ah semifinal thlengin dai ngai loh ramah City a chenpui bawk.

Chilean manager hi Sir Alex Ferguson leh Jose Mourinho tih lohah chuan Premier League-a chak percentage nei hnem ber a ni a, City manager zingah United hnuaia awm chunga season khar nei miah lo awmchhun a ni bawk.

Pellegrini a inpuang

Manchester City-in a awm lai renga manager thar an puan chungchangah Manuel Pellegrini-a'n buaina a neih loh thu sawi ṭhin mah se City a enkawl hnuhnung berah meuh erawh Chilean manager a insum thei lo.

Real Madrid boss hlui chuan, "Tun season-a Premier League nomawi chawi ngei ka duh a, mah se February thlaa club-in manager thar tur an puan hnuah club boruak a ṭha tawh lo - point thum chauha leader kan phak loh laiin kan khelmuala match pawimawh pahnihah kan chak loh phah a ni," a ti.

Ropui takin Ranieri

Kum 2004-ah Chelsea-in Claudio Ranieri an ban a, kum 12 a liam meuh chuan Italian manager hi Stamford Bridge-ah Blues player-ten zahna an lantir a, stadium khata mipui pungkhawm chuan an manager hlui hi ding chungin an lo lawm bawk - Claudio Ranieri meuh pawhin a mittui a dang zo lo.

Pathianni zana Chelsea leh Leicester City inkhelah hian Blues tan Cesc Fabregas chuan penalty aṭangin goal hmahruai khung mah se Danny Drinkwater chuan minute 82-naah yard 30 vela hla aṭangin an si phurh sutna goal ropui a khung a, team pahnih inhnehtawk nan Leicester keeper Kasper Schmeichel a che ṭha hle.

Leicester manager Clau-dio Ranieri chuan, "Zanin hi a hlimawm takzet a, ka tan chuan a lawmawm dan kha a danglam a ni. Kan fan-te leh Chelsea fan-te hnenah boruak hlimawm tak an siam avangin lawmthu ka sawi duh a ni," tiin an inkhel boruak chungchang a sawi.