Rome-ah Murray hun a thleng ve ta

Andy Murray tan Rome-ah khua a var ta! Pathianni zan Italian Open final-ah Britain number 1 Murray hian world number 1 Novak Djokovic hnehin champion nomawi a chawi.

Kum 29 a tlin champhaah Murray hian Djokovic lakah hnehna chang turin darkar khat leh minute 35 hun a hmang a, set khat naah Djokovic a service vawi khat a laksak bakah set hnuhnung zawkah ṭum hnih chhuhsak lehin 6-3, 6-3 in hnehna a chang.

Murray hi Djokovic nen clay court-a an intawn
ṭum nga aṭangin vawi khat hnehna a channa chiah a ni a, kumina Grand Slam hmasa ber Australian Open final leh kar hmasa lawka khelh zawh tak Madrid Open final-ah pawh khan Murray hi a chak lo zawkah a ṭang. Murray hian ATP ranking tharah Roger Federer lehpelin pahnihna dinhmun a luah leh dawn a, May 22 aṭanga khelh ṭan tur French Open atan inbuatsaihna a nei ṭha chho hle a ni.

Grand Slam vawi hnih champion tawh Murray hian kar hmasa khan clay court-ah tho Rafael Nadal a lo hneh tawh bawk. Tun thla tawpa an khelh tur French Open thlir nghalin, "Roland Garros-ah chuan best of five hmangin inelna kan nei tawh dawn a, mahse tun hnaia ka result avang hian inrintawkna ka neih phah hle. Duhthusam ang thlap chuan la khel lo mah ila hma ka sawn zel avangin ka lawm hle," tiin a sawi.

Tun hnaiah bik Djokovic leh Murray te hi mipa tennis awptu ang hiala ngaih an ni a, mahse Murray hian an intawn hnuhnung vawi 33 aṭangin ṭum 10 chiah hnehna a chang ve.

Britain player zingah kum 1931-a George Patrick Hughes-a'n Henri Cochet hneha Italian Open nomawi a chawi hnuah Murray hi champion leh thei hmasa ber a ni. ATP Masters title 12 a lakna chiah a ni.

Ruah sur vanga inkhelh a harsat thu sawiin Djokovic chuan, "Darkar khat chuang ruah a sur avangin inkhelh hun kha sawn tlai hret awm tak a ni a, mahse kan sawn tlai lo. Court-ah khan inkhelh a harsa hle a, ka kerek kha ṭum hnih vel ka ti na ṭep bawk. Kan elpuite nena kan inkhel a nih chuan chak kan duh ṭhin a, kan chak lo a nih pawhin pawm thiam a ṭul thung," tiin a sawi.