Italy inbuatsaihna a ṭha

Pathianni zan dar 12:15 a Poland nena Nations League khel tur Italy chuan friendly match-ah 6-0 in Moldova an sawp a, Poland hian Finland an sawp ve bawk avangin team pahnih intawng tur hi en a châkawm phah hle. 

Italy tan Stephan El Shaarawy chuan goal hnih a khung a, a hunlaia footballer ngaihven hlawh ber pawl ni ve ṭhin hi Chinese Super League club Shanghai Shenhua lamah a khel mek. 

Manchester City boss hlui Roberto Mancini enkawlna hnuaia khel mek Italy tan hian El-Shaarawy bakah AS Roma midfielder Bryan Cristante leh Sassuolo striker Francesco Caputo chuan goal khat ve ve an khung bawk. 

Kum 33 mi Caputo hian Italy tana a match hmasa berah goal a khung nghal a, a kum tam tawh mah se season hmasa Serie A-ah khan match 36 khelin goal 21 a khung. 

Serie B-ah a career tam zawk hmangin 2018-19 khan Serie A khel turin Empoli a tlinpui a, Italian top flight a a season hmasa berah match 38 khelin goal 16 a khung nghal thei. 

Season hmasa ṭan dawn khan Sassuolo a zawm a, tun season-ah pawh Serie A match thum khelin goal thum a khung leh der tawh - a football zinkawng hi a ngaihnawm hle. 

Caputo-a goal khung hnuah hian Shaarawy-a'n goal hnih a khung a, Italy-in goal khungpui mamawh lo mah se Moldova defender Veaceslav Posmac chuan an lamah a ti lut a, Sassuolo winger Domenico Berardi chuan a hnu a rawn khar. 

Italy hian first half-ah goal nga an khung hman a, kum 1987 a Malta laka first half a goal nga an khung hnua chawlhlawk hmaa goal nga an khung theih hmasak ber a ni a, 1928 a Egypt laka goal ruk an khung hnua goal ruk an khung leh hmasak ber a ni bawk. 

Moldova hian Pathianni zan dar 12:15-ah Nations League khel turin Greece an lenchilh dawn a, an mualphona hliahkhuh an tum ang.