Indian Super League Player inchuh boruak a sang; ATK-ah Didika
I League khelh zawh a ni a, Federation Cup-in a tawp lam a hnaih tawh bawk. India ramah league pahnih a awm miau avangin Spetember aṭanga khelh ṭan tur Indian Super League club-ten thawm an nei ring a, manager langsar tak tak lakluh an awm nual bakah player inchuh boruak pawh a sang hle.
Season dangah ISL draft neih ṭhin a ni a, hmun khatah ISL club pariatten lei tura chhawpchhuah player-te an in chhan huai siak ṭhin. Tun season-ah erawh kaldan phung thlak a ni a, club-te chu an player duhzawng dawra la lut turin zalenna pek an ni.
ATK-ah Didika & Robert
Indian Super League season hmasa ber champion Atletico de Kolkata an awm mai mai lo. East Bengal aṭangin Mizo tlangval Lalrindika Ralte leh Robert Lalthlamuana-te chu an la lut.
Didika hian ISL season hmasa ber kha Mumbai City tan a khel a, nikumah Mumbai club hi zawm leh mah se hliam vangin a inlan lo. Red and gold brigade captain Robert hian ISL season hnih chhung chu Delhi Dynamos tan a khel tawh a, Delhi club-ah hian beisei angin hmun a chang tam lo.
ATK hian Mizo tlangval pahnih hma hian player langsar tak tak Keegan Pereira, Bikash Jairu, Pritam Kotal leh Debjit Majumder-te an lo la lut tawh a, tun hnaiah defensive midfielder Bikramjit Singh chuan a zawm bawk.
NE United-ah coach thar
John Abraham-a club NorthEAst United chuan season thar atan Brazilian coach Sergio Farias chu an la lut. Kum 48-a upa manager hian Brazil U-20 team chu ṭum hnih (1998-99 & 2001) a enkawl tawh a, kum 2001 South American Championship-ah U-17 team chu a champion pui bawk. Farias hian khawvel huap player langsar zingah Ronaldinho, Lucio leh Diego-te chu a lo hrual tawh a, Asian football-ah pawh a mikhual lo hle.
South Korean club Pohang Steelers a enkawl laiin AFC Champions League (1), K League (1), League Cup (1), Korean FA Cup (1)-te chawipuiin kum 2009 khan FIFA Club World Cup-ah pathumna dinhmun a luahpui a, kum 2007 khan K-League Manager of the year-ah thlan niin kum 2004 khan Brazilian Manager of the year-ah hial thlan a lo ni tawh.
Highlanders tan Subrata Paul
NorthEast United-in coach thar an neih hnuah player lamah pawh thawm an nei lian hle. The Highlanders hian Indian keeper zinga tawnhriat ngah ber tih ngam Subrata Paul an la lut, Sporting Goa midfielder pawimawh Rowlin Borges leh striker Sumit Passi an la lut bawk.
Paul hian season hnih chhung ISL-ah Mumbai City tan a khel a, season hmasa khan match 12-a inlanah vawi 40 zet save neiin Mumbai club tan player pawimawh a ni.
Kerala Blasters-ah Rafique
Sachin Tendulkar-a club Kerala Blasters pawhin thawm an nei na a, East Bengal aṭangin Mehtab Hossain, Gurwinder Singh leh Mohammed Rafique-te chu loan-in an la lut.
Yellow Brigade tan kum 33-a upa Mehtab Hossain tawnhriat hi chhawr ṭangkai theih tur tak a ni dawn a, player tlanchak RG Stadium-a Aizawl FC defender-te chelh loh Mohammed Rafique hi ṭhatpui tham a ni bawk.
Kerala club hian second division league thlengin an mit an len a, player langsar pathum bakah hian Dempo SC midfielder Vinit Rai leh Lonestar Kashmir striker Farukh Choudhary-te an la lut a ni.
Mumbai City-ah Haokip
Season hmasa ISL-ah 'The Indian Beckham' tia hminglem an vuah sak Boithang Haokip-a'n Mumbai City lamah free kick hmangin goal mawi danglam bik a khung a, Manipuri midfielder thiamna hi Mumbai City thuneitute mithhlaah a la cham reng a ni ngei ang - tun season ISL atan Shillong Lajong player hi an la lut dawn.
ISL season hnih liam taah Boithang hian NorthEast United tan a khel a, mahse season hnih chhungin league match 13 chiah khelin hmun pawimawh a chang pha meuh lo. Kum 2014-a FPAI Fans’ Player of the Year chawimawina dawngtu tan Mumbai City hi North East pawn lam club tana a khelhna hmasa ber tur a ni ang.