Amla chet ṭhat Mumbai tan a tawk lo

Pathianni tlai Indian Premier League inkhelah Kings XI Punjab tan Hashim Amla che ṭha viau mah se a team a chakpui zo lo a, Sunrisers Hyderabad lakah wicket 7-in an tlawm.

Punjab Cricket Association Stadium, Mohali-a inkhelah Kings XI tan Hashim Amla chuan ball 56 lek a hmachhawnah run 96 a vaw chhuak a, a ṭhianten an thlawp ṭhat tawk loh avangin Kings XI-in over 20-ah run 179 siamin mi pali an hloh.

Hyderbad batsman zingah che
ṭha fala sawi tur awm lo mah se an ṭan rual ṭhat avangin over 19.4-ah an taget umphain min pathum chiah an hloh a, wicket 7-in chak zawkah an ṭang ta a ni. Sunrisers tana run siam hnem ber David Warner chuan ball 42 a hmachhawnah run 52 a vaw chhuak.

Pathianni zan inkhelah Mumbai Indians chuan run 80-in Delhi Daredevils an hneh bawk a, Mumbai tan ball 37 a hmachhawna run 86 siamtu Krunal Pandya chu batsman che ṭha ber niin Mumbai hian over 20-ah run 206 siamin mi pali an hloh.

Delhi Daredevils-in over 19.1-ah run 126 chiah siamin an vaiin an out vek a, an mualpho chiang hle. Delhi tan run 40 siamtu Quinton de Kock chu pangngai takin bat mah se a ṭhiante zingah run 30 vaw tling dang an awm loh avangin a mualpho zawkah an ṭang ta a ni.

Mumbai Indians bowler zingah Jasprit Bumrah a che ṭha a, kum 22 leka upa fast bowler hian over li a vawmah run 13 chiah pein wicket thum a la thei a, bowling lamah a langsar fal hle.

Zaninah Indian Premier League inkhel pakhat chiah a awm dawn a, Rising Pune Supergiants chuan Delhi Daredevils chu zanin dar 8:00 hian an hmachhawn ang.