Mizo club-in Federation Cup final an thleng Guwahati-ah Aizawl FC Vs Mohun Bagan

Mizo champion Aizawl FC-in India ram club ṭha pariat inelna 2016 Federation Cup final thleng turin Goan champion chu 'away goal rule' hmangin an hneh.

Pathianni zan khan Fatorda Stadium, Goa-ah Aizawl FC-in Joel Sunday leh Lalchhawnkima penalty hmangin ṭum hnih hma an hruai a, Sporting Clube de Goa-in Sumit Passi leh substitute Glan Martins te hmangin sut ve ve mah se Goan club-in Mizorama goal an khung loh an tuar. MPL champion-in Fed Cup final an lut a, May 21 khian champion ngun ber Mohun Bagan nen Guwahati-ah nomawi an inchuh ang.

Goa-ah chuan

Sporting Goa-in inhliam vangin Aizawl-ah Densil Theobald an hruai tel lo a, second leg-ah Trinidadian midfielder hi squad-ah awm mah se a la dam chian loh vangin bench-ah ṭhuttir a ni.

Goan coach Mateus Costa-a'n star-ting eleven-ah player pathum a thlak. Tlarhnungah Mehrajuddin Wadoo aiah Joseph Clemente a dah lut a, inhliam vanga khel thei lo Rowlin Borges aiah Ganesh Thakur lutin RG Stadium-a second half-a khel ṭha Victorino chu Seriton Fernandes aiah luhtir a ni bawk. Goan club midfield-ah hian Mahmoud Amnah chu innghahna a ni chhunzawm zel a, goalkeeper chu Arindam Bhattacharya bawk a ni.

Aizawl FC-in defender ṭha Lalruatthara chhawr thei tawh mah se Lalchhawnkima a dam hman avangin first leg-a player-te bawk Jahar Das-a'n tlarhnungah a ring nawn. Bengali manager Das-a'n a sawi lawk ang ngeiin Albert Zohmingmawia chu inkhel bul a ṭantir a, Kawnpui tlangval hian Lalramzauva Khiangte a thlak.

Sunday-a inkhelah hian Joel Sunday chu Mizo club hmatawngah a awm a, Liberian forward Alfred Kemah Jaryan-a'n Nigerian striker hi a thlawp.

Sunday-ah Sunday

Aizawlah Goan champion leh Mizo champion goal awm loin an inhnehtawk a, Jahar Das-a'n away goal rule pawimawhna hre rengin attacking football an khelh tur thu a sawi lawk.

Bengali coach-in khelmual chhungah a thusawi bawhzuiin goal khung tumin an nawr a, Goan club keeper Arindam Bhattacharya tana harsatna tur erawh an siam thei mai lo. Sporting Goa tan final thleng turin goal a pawimawh a, Aizawl FC tlarhnung tan Nicholas a hnawk a, Goan winger hian goal kil takah pet mah se keeper Soram Poirei-a'n a dang ṭha hle.

Team pahnih an intluk tawk a, minute 37-naah Alfred-a ball pass ṭha tak chu Joel Sunday-a'n um lutin box chhung aṭangin chiang takin a pet goal a, Arindam-a tan dan ngaihna a awm lo. Nigerian striker hian tun inelnaah goal li a khungna chiah a ni a, Mizo tlangval Jeje Lalpekhlua goal khung zat khung turin goal hnih dang a la mamawh.

Aizawl FC an fimkhur tawk lo a, hmahruaitu nichungin first half khar thei mah se hun tawp lama an talbuai an tuar. Hun pek belhah Pratesh Shirodkar-a corner pet chu defender Loveday tauh hnuah Summit Passi chuan keeper Poirei inrawlh hmain goal-ah a tauh lut.

Goal leh Red Card

Aizawl FC-in goal an khung avangin 1-1 in inkhel tawp pawh ni se final an lut thei tih an hria a, amaherawhchu minute 45 dang khelh tur a la awm avangin defensive game an khel mai lo.

Inkhelh ṭan aṭanga darkar khat hnuah Alfred Jaryan-a'n a ball thiamna a lantir a, Liberian forward ball pass chu captain David Lalrinmuana'n hmang ṭangkaiin Pratesh lakah penalty a hlawh chhuak. Penalty pet thiam Lalchhawnkima a rawn pen chhuak a, Champhai tlangval ball petna lam hi Arindam-a'n ring dik mah se Bengali keeper hian a dang lo.

Sporting Goa-in final lut turin goal hnih an mamawh a, Aizawl FC lamin goal venhim an mamawh. Goal hnihna luh hmain winger H. Lalmuankima aiah Lalruatthara chu tlarhnung tichak turin an luhtir a, goal luh hnuah Kawnpui tlangval Albert aiah R. Malsawmtluanga a lut bawk.

Substitution zinga fuh ber erawh Mateus Costa rawn luhtir Glan Martins a ni. Goan midfielder hian a luh aṭanga minute hnihna lekah goal a khung nghal a, keeper Poirei tihsual vangin Aizawl FC dinhmun a derthawng. Passi freekick hlawhchhuah chu Loveday-a'n wall pet per nan hmang mah se tlarhnunga a kawppui Subashish Bose-a'n goal-ah pet nghalin keeper Porei-a'n mak takin Martins tan a siam sak a, Goan midfielder hian goal ruakah a khung.

Aizawl FC-in goal khat an chhuah leh chuan an chak dawn lo tih an hria a, field pawn leh chhungah an talbuai hle. Goal venhim kawnga midfielder ṭha ber Yuta Kinowaki aiah Brandon VL Remdika a rawn lut a, Japanese midfielder pawhin coach thutlukna hriathiam a har a ti tih a chet dan hmangin a hriat theih.

Sporting Goa goal hmaah an hlauawm a, hun khawhral vangin Joel Sunday-a'n yellow card a hmu a, hemi hnu lawk hian captain David-a'n inzir nan a hman loh avangin yellow card vawi hnihna a hmu a, hnawhchhuah a ni.

Injury time-ah Theobald a rawn lut a, Sporting Goa goal nawr a na sawt. Counter attack-ah Aizawl FC-in goal khung theihna chance a nei ve tho a, Sunday-a'n mimal hmingṭhatna a duh luatah changtu nei lo Brandon-a pe loin goal-ah a pet a, goal ban bak a pet per lo.

Hun tawpah Aizawl FC an vannei a, Amnah shot-cross chu Passi tan khung ngei tur ni mah se Punjabi striker naupanna a lang a, a khawih fuh hman lo. Mizo club an ṭang tluan a, 2-2 a inkhel tawp zuiin MPL champion-in Federation Cup final an thleng.

Das a lawm lo

Final-a Aizawl FC hruai thlengtu Jahar Das chuan, "David-a kha a chetdan vanga hnawhchhuah tur a ni lo. Freekick kha a petna lo turah an pet dawn avangin a kut hmangin a dah let a ni mai a, referee khan dinhmun chhe zawka min dah a tum ve ve hrim a ni," tiin referee chungah a lungawi lo hle.

Pathianni zan inkhelah hian injury time-ah minute nga pek belh a ni a, referee hian minute riat hnuah inkhel a titawp chauh.

Bengali coach Jahar Das chuan sawi chhunzawmin, "Sunday-a'n yellow card a hmu a, match hmasa lamah yellow card a hmu tawh bawk. Final-ah David leh Sunday kan chhawr thei lo a nih chuan Mohun Bagan hi an huphurhawm lehzual ang. Amaherawhchu knockout tournament a ni a, engpawh a thleng thei a ni. Chak ngei tumin theihtawp kan chhuah ang," tiin Vanglaini palai a hrilh.

Aizawl FC technical director Hming-thansanga chuan, "David-a red card chung-chang kha hriatthiam har ka ti a, match commissioner pawhin referee kha pressure sangah a talbuai thu min hrilh. Kan captain khan yellow card a hmuh hmasak hnua a foul lehna hmasa ber a ni a, red card pekna tur khawp a ni lo," tiin captain David-a thlavang a hauh.

AFC Cup-ah Relegate club?

Federation Cup champion hian season tharah Asia khawlmualpuia football club te inelna sang ber dawttu AFC Cup an khel dawn. Aizawl FC hi tun season khan I League aṭangin an relegate a, final-ah Mohun Bagan an hneh thei a nih chuan season tharah AFC Cup an khel thei ang.

2009-10 season khan I League kai thar Shillong Lajong chu relegate nghal mah se Federation Cup-ah final an thleng a, amaherawhchu North East aṭanga I League khel hmasa ber club hian final-ah East Bengal an hneh lo.

Season liam ta khan Dempo SC chu I League aṭangin an relegate a, Goan club ṭha hian Federation Cup final erawh an thleng tho. Amaherawhchu Dempo SC hian final-ah Bengaluru FC an hneh lo.

Aizawl FC-in final kalkawngah Federation Cup champion lai leh I League champion thar Bengaluru FC an hneh tawh a, nomawi chawi turin RG Stadium-a an hneh tawh Mohun Bagan an hmachhawn dawn. Mizo mipuiin nomawi an beisei a, Kolkata club lianin phuba lak an tum thung ang.