Germany leh Turkey an inhnehtawk

Nilaini zan friendly match-ah Germany leh Turkey te 3-3 in an inhnehtawk a, Chelsea midfielder Kai Havertz-a'n bul ṭanin goal khung hmasa pahnih hi a siamsak a ni.

RheinEnergieSta-dion, Cologne-a inkhelah Germany tan Julian Draxler (45+1'), Florian Neuhaus (58') leh Luca Waldschmidt (81') ten goal an khung a. Mikhual Turkey-in Ozan Tufan (49'), Efecan Karaca (67') leh Kenan Karaman (90+4') te hmanga chhang leh zelin chak zawk an awm lo.

Joachim Low-a'n friendly match hi player enchhhin nan a hmang a, player naupang zawk a chhawr. Germany-in inkhel an thunun a, chance ṭhahnem tak nei mah se chak nemnghehna goal an khung theih loh avangin Turkey-in injury time-ah siphurh an sut.

Germany hian tun Inrinni zan hian Nations League-ah Ukraine an hmachhawn dawn a, September 13, Thawhlehni zanah Switzer-land nen an inkhel leh bawk ang. Joachim Low chuan Nations League atan hian keeper Manuel Neuer leh Serge Gnabry te chu dah ṭhain Turkey lakah hian a chhawr lo.

Die Mannschaft hian Nations League-ah chak an la nei lo a, an match hnuhnung pahnihah Turkey leh Ukraine nen an inhnehtawk. Low chuan, "Ka player-te kha inkhelh ho ngai lo an ni a, han dem viau a harsa. Amaherawhchu kan chak zawh loh avangin ka thinrim a, pawi ka ti hle. Kan chance neih kan khung loh avangin Turkey-in beiseina an neih reng phah a ni," tiin inkhelh banah a lungawi loh thu a sawi.

Low hian Chelsea manager Frank Lam-pard-a hman duh loh Antonio Rudiger chu bul ṭantu zingah a hmang a, Germany boss chuan nipui transfer-ah chhuak thei ta lo mah se thlasik bazarah a chhuah theih a beisei thu a sawi.

Germany inkhel hi a tirah entu 9,200 awm turin ruahmanna siam a ni a, amaherawhchu Covid-19 vei an pun leh tak avangin mi 300 bawr vel chauhin inkhel hi an en thei a ni.