Serena Williams a lo kir e

WTA title thla kua zet la loa awm hi Serena Williams tan chuan a rei hle. Tunah chuan court chhungah Serena a rawn inlar leh ta a, Pathianni zan khan Madison Keys lakah darkar khat leh minute 24 chhungin 7-6, 6-3 a hnehna changin Italian Open nomawi a chawi leh ta.

World number 1 Serena hi nikum August thlaa Cincinnati Open-a a champion hnuah a la champion leh lo! French Open champion lai ni mah se tun thla tawpa khelh tur Grand Slam-ah hian champion tura rinkai a ni lo hman hial. Mahse, tunah chuan a ṭha ber a nih zia a lantir leh ta e.

Kum 34-a upa Serena hian 1995 aṭang khan professional tennis a khel ṭan a, Martina Navratilova, Chris Evert, Steffi Graf leh Margaret Court te hnung zuiin WTA titles 70 a la tling ta chiah a ni.

Grand Slam vawi 21 cham-pion tawh Serena chuan, "US Open, Australian, Miami leh Indian Wells-ah te hlawhtling lo mah ila tunah WTA titles 70 ka la tling thei ta a, a bik takin clay court-ah a nih avang hian a lawmawm zual a ni," tiin kumina a nomawi hmasa ber a chawi zawhah a sawi.