Hodgson-a'n player 26 zingah Rashford a telh

England manager Roy Hodgson chuan Euro 2016 khel thei tur player 26 hming a tarchhuak a, kum 18-a upa Marcus Rashford a telh laiin Arsenal forward Theo Walcott, West Ham forward Andy Carroll leh Sunderland forward Jermain Defoe te tan hmun a awm lo.

Kum 68-a upa Hodgson hian May 31-ah player 23 awmna final squad a thehluh a ṭul dawn a, player pathum paih a la ṭul dawn tihna a ni.

Rashford hian February 25 khan Manchester United senior team tan a khel ṭan chauh a, match 16 khelin goal sarih a khung. England boss chuan, "Rashford hian elpui a la ngah tih a hriatthiam a ṭul. Player hming hraw zawkte hi a nekchhuah theih lohna tur a awm lo a, chutirhualin mi tam tak ngaihdan ang ngawta awlsam chu a ni lo ang," tiin United rawlthar dinhmun a la chian loh thu a sawi.

Premier League champion Leicester City aṭangin Danny Drinkwater leh Jamie Vardy te telh an ni a, inhliam vanga hun rei tak inlan thei lo Jack Wilshere leh Jordan Henderson te hming a lang tel bawk.

Player thlan dan sawiin Hodgson chuan, "Player thlan chungchangah Wayne-a thurawn ka la lo. Player leh captain a nihna angin mawhphurna a nei ngei a, amaherawhchu player thlan chungchangah chuan kei, Ray Lewington leh Gary Neville ten mawh kan phur," tiin Manchester United captain Wayne Rooney a inrawlh loh thu a sawi.

Player 26 awmna England squad chu :

Goalkeepers : Joe Hart, Fraser Forster, Tom Heaton

Defenders : Ryan Bertrand, Gary Cahill, Nathaniel Clyne, Kyle Walker, Danny Rose, Chris Smalling, John Stones

Midfielders : Dele Alli, Ross Barkley, Fabian Delph, Eric Dier, Danny Drinkwater, Jordan Henderson, Adam Lallana, James Milner, Raheem Sterling, Andros Townsend, Jack Wilshere

Forwards : Harry Kane, Marcus Rashford, Wayne Rooney, Daniel Sturridge, Jamie Vardy.