Michel Platini khumtu Giroud

Olivier Giroud-a'n Ukraine lakah goal hnih a khung a, an ram France tana a goal khung zat chu 42 a ni. Les Bleus tana goal khung hnem lamah legend Michel Platini a khum a, a chungah Thierry Henry chiah a awm.

Nilaini zan friendly match-ah France hian Ukraine 7-1 in an sawp a, striker palian Giroud-a'n goal hnih a khung bakah rawlthar Eduardo Camavinga, Corentin Tolisso, Kylian Mbappe leh Antoine Griezmann ten goal khat ṭheuh an khung - Vitaliy Mykolenko chuan anmahni lamah a ti lut bawk.

Didier Deschamps-a nauten inkhel thununin an duh angin an khel thei a, AC Milan leh Chelsea striker hlui Andriy Shevchenko enkawl Ukraine erawhin Viktor Tsygankov hmangin goal khung ve mah se mualpho a hliahkhuh phak lo.

Arsenal striker hlui hi a khelh mekna Chelsea manager Frank Lampard-a'n chhawr mumal duh lo mah se Deschamps erawhin a ṭhatna lai a hria a, tlarhmaah a ring ngam. Rin a hlawh ang ngeiin Giroud pawhin amah ringtu beiseina a ti thlawn ngai lo.

France tan match 11 a khelh niah goal hnih a khung a, ram tan kum 10 chhungin goal 42 a khung tling ta - Platini chu goal khatin a khum a, goal khung hnem ber Henry (51 goals) a phak lohna chu goal kua chauh a ni.

Henry khan ram tan match 123 a khel a, club lama rinrawl a nih ṭhin bawk avangin record a siam hi a mak lo. Kum 34 mi Giroud tan Henry-a record hi umphak theih a la ni, chutih rualin nakkum nipuia khelh tur European Championship thleng bak hun a neih a rinawm loh thung.

Ram tana goal 42 khung thei Giroud chuan, "Ram tana match 100 ka khel tling thei hi ka lawm, chumi rual chiah chuan goal ka khung belh avangin ka lawm bawk. Nakinah chuan ka sulhnu hi ka la chhut let ang a, chhuang takin ka la sawi ve ṭhin ang.

"Tun dinhmunah chuan record hi ka la ngaihtuah lo, goal khat khung belh chauh pawh thil awlsam a ni si lo. Goal 47 vel ka khung tling thei a nih chuan Henry sulhnu chu ka ngaihtuah chauh ang," a ti.

Ukraine nen an inkhel thlirkirin Giroud chuan, "Shevchenko kha ka player ngaihsan leh duh berte zinga mi a ni ṭhin, tunah chuan team enkawltu ṭha tak a lo ni tawh. Ani hma ngeia goal ka khung thei kha ka lawm a, a hluin ropui ka ti bawk," a ti.