Kan tluk an chang reng a ni - Van Dijk

Liverpool defender Virgil van Dijk chuan an tluk hun chang mi tam tak an awm avangin an hmaa chona inchhawp a hautak thu a sawi a, "A tawp in thlen chuan mi zawng zawng hian tla turin an duh che u a, chu chu hringnun chu a ni miau si," a ti. 

Premier League champion Liverpool hian an league match hnuhnung berah Aston Villa chu 7-2 in an ngam lo a, an mualpho hle. Kum 29 mi defender chuan, "A sang bera awm reng tura beih lai hi thil harsa tak chu a ni," tiin a sawi. 

VVD chuan a tawp thlenga theihtawp chhuah a duh thu sawi zuiin, "Ka chawlh hma chu ka theihna zawng zawng nena khelh hi ka duh dan a ni a, a hnua inchhir ka duh lo. Kan hmaa chona inchhawp zel tur hi a hautak dawn. 

"Champion lai kan ni a, he dinhmun thleng tur hian nghah rei a ngai hle. Kan hun tawn mek nuam ti taka hmang chunga kan hmaa inchhawpte hmachhawn zel hi kan tihtur a ni," a ti.

Kum 2017 a pound maktaduai 75 a Liverpool zawmtu defender hian a career ṭantir lamah chuan Willem II tan a khel a, first team tan a khelh phak loh avangin thleng silin a inhlawh ṭhin - VVD chuan, "Vanneihna chu a ngai tel ngei a, hlawhtling tura pawimawh ber erawh thawhrimna a ni," a ti. 

Hetihlai hian football khawvelah Covid-19 vangin inkhel entu an awm thei rih lo a, hei hi VVD chuan hrehawm a tih thu a sawi. Dutch defender chuan, "Anfield a min ṭantu fans an awm chuan hmachhawn kan hautakzia mi zawng zawngin an hria a ni. 

"Mahni muala khelh a nawm phah em em a, chutihrual chuan khualmuala min au eltu an awm pawhin a engti emaw zawng tak hian minti ṭang hlauh ṭhin - heng zawng zawng hi ka ngai hle. Engtikah emaw chuan a pangngaiin thil a kal leh theih ka beisei tlat a ni," tiin a sawi.