Ronaldo-a'n goal a khung lo

Portugal forward Cristiano Ronaldo-a'n ram tan goal 101 a khung tawh belhchhahna remchang nei mah se Spain nena friendly match an khelhah goal a khung thei lo a, team pahnih hi 0-0 in an ṭin. 

World Cup 2018 hnua a vawi khat nan team pahnih hi an intawng a, mahse Russia rama  3-3 a an inhnehtawk ṭuma hattrick siamtu Ronaldo-a'n goal a khung thei lo. 

Juventus forward hian bar a tih per a, French club Lille tana khel mek Renato Sanches chuan bar a tihper ve bawk. Inkhel hi a hmunah mi 2,500-in an en a, Sporting Lisbon khelmual, mi 50,000 lenna Jose Alvalade stadium-ah khelh a ni. 

Spain a piang, Mali lam mi Adama Traore chuan a pianna ram tana inkhelh a thlan hnua a vawi khat nan Spain jersey a rawn ha bawk a, second half a luhtir Wolverhampton Wanderers winger hian Dani Olmo tan hun ṭha rawn siamsak mah se Wolves tana a khelhpui goalkeeper Rui Patricio chuan a dansak. 

RB Leipzig attacking midfielder Olmo hian first half a a chance neih chu a chhawr thei lo bawk a, Leeds United striker Rodrigo-a'n a hun ṭha neih chu goal sir lamah a khawhral bawk. 

Spain coach Luis Enrique-a'n friendly match hi enchhin nan hmangin tlarhnugnah Eric Garcia leh Diego Llorente te chhawrin tlarhmaah Dani Olmo, Rodrigo Moreno leh Gerard Moreno te a hmang. Manchester United keeper David de Gea aiah Chelsea a hmun chang phak lo goalkeeper Kepa Arrizabalaga lutin Kepa hian Ronaldo thlaktu Joao Felix-a goal shot chu ṭha zetin a dang. 

Real Madrid captain Sergio Ramos chu hun tawp dawnah luhtir a ni ve bawk a, ram tana a match 173-naah Spanish defender hian goal khungna remchang nei mah se a chhawr thei lo. 

Spain hian Inrinni zan dar 12:15-ah UEFA Nations League match khel turin Switzerland an mikhual dawn a, Portugal hian Pathianni zan dar 12:15-ah Nations League match khel tur vekin world champion France an lenchilh ang.