United number 7 - Ropuina nge Anchhia?

Manchester United-in an player tharte jersey number hak tur an tichiang a, Edinson Cavani-a'n jersey number 7 a ha dawn. United legend George Best, Bryan Robson, Eric Cantona, David Beckham leh Cristiano Ronaldo te number hak ṭhin a nih avangin Old Trafford-ah jersey number 7 in ngaihhlut a hlawh a, chutihrualin an hlawhtlinpui vek lo tih hriat a ṭha.

United legend George Best kha jersey number 7 larpui hmasa a ni a, Northern Irish footballer khan ball a thiam bakah a pet goal thei bawk. Matt Busby hoa United-in kum 1968 a European Cup an champion khan Best hian final-ah Benfica lakah goal ropui a khung a, hnehna an channa chhan pakhat a ni.

Best hi a hmel ṭhat avangin khelmual pawnah pawh a lar a, 'the fifth Beatle' tiin hming lem an pe. Khawvela player ropui ber anga mi tam takin an chhal Pele pawhin, "George Best hi khawvela player ropui ber a ni," tiin a sawi tawh. Chutihrualin Pele hian a ngaihdan dik tak sawi loin a thiamzia uar taka a sawinaah a ngaih theih.

Brazil legend Pele hian, "Lionel Messi chungah Cristiano Ronaldo a awm a, khawvela ṭha ber chu keimah hi ka ni," tiin kumin kumtir khan a sawi a, amah hi khawvela ṭha a tih ber zawk chu a ni. Chutihrualin Best hi a thiam tih erawh a chiang a, Cristiano Ronaldo ṭhatzia a hriat theih bawk.

Bryan Robson hi Manchester United tan legend a ni a, a hun tawp lamah Premier League nomawi pahnih a chawipui. A ropuizia tichiangtu chu David Beckham-a'n a naupan lai aṭanga a entawn a ni a, Robson ang bawkin Beckham-a'n number 7 a larpui. Ball pet thiam hmingthang Beckham hi a hmelṭhat tel avangin khawvel huapa United number 7 ti lar bertu a ni hial zawk ang.

Chutihrualin Eric Cantona sawi hmaih a thiang lo a, French forward-in a jersey nghawng an ti chho ṭhinte chu a larpui hle. '1966 hi English football tan kum ṭha a ni, Eric-a pian kum a nih avangin' tiin an sawi ṭhin a, hemi kum hi England-in World Cup an champion ṭum a nih ve chiah avangin Manchester United tana Eric Cantona ropuizia a sawifiah chiang hle.

Sir Alex Ferguson meuhin 'Christmas tree' timawitu zinga a chung bera arsi nen hiala a tehkhin Cristiano Ronaldo-a'n number 7 a ha tawh a, Portuguese forward hi United number 7 ha tawha ṭha bera chhal theih a ni. Amaherawhchu Ronaldo hian English club a chhuahsan hnuah football career duhawm tak a nei chho zel a, United tan ngawr ngawr chuan player ropui ber tia sawi a rem bik lo.

Manchester United-in Cristiano Ronaldo chhuah hnuah number 7 hi player hrang hrang hnenah an hlanchhawng a, Liverpool legend Michael Owen meuh pawhin a hlawhtlinpui lo. 

Owen hian mak takin Reds hmelma United hi kum 2009 khan a zawm a, season thum chhungin league-ah goal nga chauh a khung. Chutihrualin Manchester Derby-ah Owen hian September 2009 khan goal hlu bik a khung a, United ṭantuten he goal hi an hre reng ang.

Wigan Athletic aṭanga United zawmtu Antonio Valencia-a'n number 7 a ha ve ngawt a, pressure rit tak avangin a talbuai phah. Ecuadorian player hian jersey number 25 a ha zui a, United tan player pawimawh ni mah se number 7 erawh a hlawhtlinpui lo. 

Kum 2014-ah Angel Di Maria a rawn lang a, Real Madrid aṭanga English club zawmtu hian number 7 rawn ha nghalin thawm nei lian mah se Louis van Gaal-a'n a chhawr fuh tawk lo bawk nen season khat bak a daih lo.

Dutch winger duhawm Memphis Depay pawhin Man United-ah jersey number 7 a ha nghal a, English club-ah beisei a pha lo. Kum 26 mi Depay hi Lyon tan a khel a, Netherlands-ah player pawimawh niin Barcelona nen hiala sawi zawm ni leh tawh mah se Old Trafford-ah sulhnu ṭha a hnutchhiah lo.

Arsenal aṭangin Manchester United-in Alexis Sanchez an thlem chhuak a, Chilean forward chungah hian beiseina sang tak neiin jersey number 7 a ha nghal. Amaherawhchu Alexis hi sum tam taka vur ni mah se United tan Premier League-ah goal thum chauh a khung a, English club-in a hralhchhuah dan an zawng nasa a, tun nipui transfer khan loan a a khelhna Inter Milan-ah a nghetin an hralh thei ta hlauh.

Manchester United ṭantute suangtuahnaah chuan Jadon Sancho-a'n jersey number 7 hi a ha hman a, an lak theih tak loh hnuah pawh an lak theih hun atan number 7 hi an la dah ṭha rilru hial ang. Amaherawhchu Sancho tana an zuah number 7 chu Edison Cavani-a'n a ha dawn. PSG jersey number 9 ha ṭhin Cavani hian Uruguay leh Lazio tan number 7 hi hlawhtling takin a ha tawh ṭhin.

Kum 33 mi Cavani hi United ṭantuten hmu châk tawh mah se Covid-19 vangin a la inlan mai dawn lo. Uruguayan striker hian June thlaah PSG a chhuahsan a, 'elite athlete bubble' chhungah a awm lo. Club a neih loh avangin Cavani hian Covid-19 test a nei ṭha tawk lo a, England-a dan hman lai angin ni 14 chhung khung hran a ngai dawn.

Cavani khung hran hun hi France aṭanga England a thlen hun October 4 aṭanga chhiar ṭan tur a ni a, October 17-a Newcastle United nen an inkhelh hunah chhawr theih a ni lo ang. United hian October 20-ah PSG nen Champions League-ah an intawng dawn a, hetah hian Cavani hi beisei theih ni tawh mah se match fitness a la inlan a rinawm lo zawk.

England striker Harry Kane pawh August thlaa Barbados a chawlh a hman avangin ni 14 chhung khung hran a ni a, Cavani tan pawh dan zawm loh chu tih dang a awm lo. Uruguay striker Cavani-a'n jersey number 7 nena a inlan hmasak ber chu Chelsea nen October 24-a an inkhelh hunah a nih hmel ta hle.