Premier League hmawr bawkna chu! Champion thei Man City leh Arsenal

A hun chu a thleng dawn ta - Pathianni zan dar 8:30 a ni ang a, khawvelin Premier League a thlir dawn; Mizote pawhin inkhawm banah TV kan ṭhutchilh leh nghal ang, champion kan hre tawh dawn a ni.

Champion lai leh hmahruaitu ni bawk Manchester City chuan West Ham United an lo mikhual dawn, an chak a nih chuan Pep Guardiola naute an champion ang, an elpui Arsenal inkhel result an ngaihchan tel a ngai dawn lo.

Arsenal pawhin beisei an la nei, ṭhangkhat lian zet a liam hnua EPL nomawi chawi an beiseina erawh an mikhual Everton an hneh bakah Man City chetsual an chân tel a ngai dawn - Emirates Stadium bakah Etihad Stadium an ngaihtuah tel a ngai tihna a ni.

Record a hnai

Premier League hi champion harsatna hmun, team an intluktlanna leh ineltawk em emna niin an sawi ṭhin. Pep Guardiola rawn lan chinah erawh thawnthu ziah danglam a ni fo, tunah chuan a zawna vawi li champion thei dinhmunah an ding ta.

Sir Alex Ferguson meuh pawh khan a zawna vawi li champion hi a thei lo, thil awlsam lo tak a ni tih chu a chiang hle. Spanish manager Pep-a tan champion a châkawm zual dawn, midangin an tih theih ngai loh titheitu nih kha a hlu hle ang.

Man City hian an goalkeeper Ederson an chhawr thei dawn lo - Brazil international hi a mit (eye) a hliam. Ederson hian West Ham a hmachhawn theih dawn loh bakah Manchester United nen FA Cup an khelh hunah pawh a inlan thei dawn lo.

Tottenham an hneh ṭumin Ederson hi thlak a ni a, a lungawi lo hle. Mahse, amah thlaktu Stefan Ortega chu Man City chhanhimtu tia sawi theih khawpin a khel ṭha ta si - Hammers lakah pawh ani hi enbik hlawh a ni ngei ang.

City an ṭha

Erling Haaland an nei a, a chawm turin Kevin de Bruyne, Bernardo Silva leh Phil Foden te an nei bawk - Citizens hian goal khung lamah harsatna an nei lem lo ang tih a chiang a, mikhual team lam tan anni ho inkawp ven hi a hautak leh dawn.

Chutihrualin, Man City hi Spurs khelmualah an inkhel a nghet bik lo, an goal nawr a nat tawk loh bakah an tlarhnung a nghing ve fo bawk. Hammers manager David Moyes tan match hnuhnung ber a ni dawn a, chuvangin Pep leh a naute hi chesual thei an ni ve tho.

Amaherawhchu, tawnhriat ngah leh boruak sang hmachhawn thei tur kan zawng a nih chuan Man City aia thlan tur an awm kher lo ang. Guardiola naute hian Liverpool nena league nomawi inchuh boruak sang an palltang tawh - Arsenal nena inchuh boruak hi an tan a harsain a rinawm loh.

Inven an ngaihna tur chu an tlarhnung lam a ni ang, tun season Premier League leh Champions League match 46 an khelh zinga 33 tehmeuhah goal an chhuah, goal chhuah loa match khelh tluan an harsatna hi Arsenal tana beiseina siamsaktu pakhat a ni ve bawk.

Moyes leh a naute

David Moyes kaihhruainain season hmasa khan West Ham hian Europa Conference League nomawi an chawi a, hun ropui an tawng. Mahse, an captain Declan Rice chu Arsenal lakah an chân a, manager Moyes meuh pawh season tawp rualin a chhuah a ngai.

Man City lamin ball an chang tam leh dawn tih a chiang a, hemi karah hian West Ham hian counter attack an hman a rinawm. Mohammed Kudus leh Jarrod Bowen te hi an cherangin khingpuite hrem thei tak an ni, anni pahnih hi City tana ven ngai tur tak an ni ang.

Tun season chhungin West Ham hian Liverpool, Arsenal, Tottenham leh Aston Villa an lenchilh ṭumin goal an khung vek. Moyes tana match hnuhnung ber a nih bawk avangin theihtawp an chhuah a rinawm a, inkhel a hmuhnawm ngei ngei dawn.

Man City tan goal khung a pawimawh dawn, inhnehtawk ringawt a him si lo - mahni inveng tak chunga goal an nawr hi football ngainatute tan chuan a hmuhnawm leh dawn, an chet fuh ṭum a nih chuan an mikhual hi an sawp hrep a nih pawhin a mak lo ang.