Beiseina neitu Arsenal

Arsenal Wenger hoin ropui takin Premier League an lo awp tawh a, a hnu lamah erawh Champions League an khelh theih tur an chhut buai thei hle - Mikel Arteta kaihhruaina hnuaiah champion an sawi ngam ve leh ta.

Match khelh hmabak panga an la neih lai khan Arsenal hmabak hi a la hautak hlea ngaitu an tam, a chhan chu an hmaah - Chelsea, Tottenham leh Manchester United te an awm vang a ni a, mahse heng an hna hautak tura ngaihte hi an hneh fai vek.

Mahse, Mikel Arteta naute an cheṭha viau chungin Manchester City an chesual duh tlat si lo a, season khat chhunga an chak hnem ber (27) ṭum tawng si hian champion lo thei dinhmunah an ding, champion hlauh thei an ni chauh zawk tiin a sawi theih.

'Next Season' tiin an fiam ṭhin a, he thu hi tun season khar niah pawh club dang ṭantuten Arsenal an fiamna ṭawngkam a ni leh mai thei. Man City an chesual hlauh a nih erawh chuan beiseina chhete an la neih hi lawmna mittuiin a zui daih thei thung.

Arsenal manager Arteta-a'n a player neih ṭhatte a chhawr kim thei dawn niin a lang. Bukayo Saka chuan hliam tenau nei mah se training a zawm pangngai leh tawh a, tun ṭumah hian a tir aṭanga a inlan theih a rinawm.

Emirates Stadium a ni dawn a, an khelh fuh ṭum a nih chuan Arsenal hian goal nga khung pawh an harsat kher lo ang. Chumi tur erawh chuan a tir aṭanga an rik phat a ngai ang - Kai Havertz leh a ṭhiante lakah mawhphurhna a sang dawn hle tihna a ni.

Everton hi zuam ngawt chi erawh an ni bik lo. Point paihsak an ni chungin Premier League khel zel turin an inhamtang thei, tun hnaiah an khel ṭha tluang viau bawk. Chelsea an hneh loh hnuah a zawnin match nga chhung an tlawm lo, an boruak a ṭha ang reng hle.