Phal loten mangṭha aw 'The Normal One'

T-Melody zaipu Zaithanmawia'n

"Min dem lul suh aw

Annem vala hi ngaihlungrun

Ṭhen nan kawl a êng ta si

Phal loten mangṭha aw di..."

an ti vang vang kha chu lung a leng ṭhin a ni, ti ru? Tlangval tam takin an hmangaih em emte thlah nan an hmang a, tlema 'soft' deuh phei chu an mittui a tlak phah - an ti!

"Phalloten mangṭha..." tih lai tak hi tun ṭumah chuan Liverpool fan-ten mawi an ti a, phal lo leh ui tak chungin an hmangaih Jurgen Klopp an thlah dawn a, "Ṭhen nan kawl a êng ta si..." tiin nghakhlel lo takin kartawp inkhel an nghak.

Pathianni zan dar 8:30-ah Liverpool chuan Wolverhampton Wanderers an mikhual dawn a, Jurgen Klopp-a hnuaia Reds an khelh tawpna ber a ni dawn. Ni e, i chhiar dik e - Klopp-a'n Liverpool a enkawl leh ngai tawh dawn lo.

Klopp hian season laihawlah khan Liverpool a chhuahsan tur thu hi a lo puang tawh a, a hun a lo thlen dawn meuh chuan Liverpool fans lung a leng - Kop ho pawh an 'man' tehlul nen, Pathianni zanah chuan an 'soft' ve det dawn!

Beiseina siamtu

October 8, 2015 khan Liverpool-in coach atan Jurgen Klopp an thlem lut a, kum thum atan contract an ziahpui. Khatihlai khan an club chanchina coach ropui ber pawl tur an la lut tih an inhrethiam bik kher lo ang - beiseina erawh an nei.

German pachal, Borussia Dortmund-a hming ṭha em em a ni a, game boruak sangah Klopp a mikhual lo. Mahse, Premier League la champion ngai lo Liverpool a pan a, hemi hma season-ah beisei anga Dortmund a chet ṭhatpui loh avangin rinhlelhna mitmeng nena lo thlirtu pawh an kat ve nuk tho.

Klopp-a'n press conference a hmachhawn chiah a, sapṭawng a thiam em em a, ṭawngkam a thiam bawk si - Liverpool fans chauh ni loin, English media-te chu a zunah an uai nghal a, Reds ṭantuten eng emaw takin a hmuak tih an hrethiam ṭan.

German coach hian, "Beiseina reng reng nei tawh lote chu beiseina kan siamsak leh ang," tiin Liverpool fan-te a hnem a, Jose Mourinho-a ṭawngkam lar tak, "The Special One" behchhana an zawhna lah, "The Normal One ve mai ka ni e," tiin thiam takin a chhang a, a ni khatna aṭangin Klopp-a lakah beiseina a sang nghal.

Zinkawng ngaihnawm

Klopp-a'n Liverpool-ah nomawi langsar pasarih a chawi hman, han tih mai pawh hian a ropuizia a hrilhfiah a, mahse, chumi piah lama a sulhnu thlirin, Jurgen Klopp hian fak a phu leh zual.

Liverpool a enkawl ṭantirh khan an tlusawp mek, tih chu a hrilhfiahna awlsam ber a ni. Mahse, a season hmasa berah League Cup leh Europa League final a hruai thleng nghal a, team nghet ṭha tak a din chho bawk.

Reds player ropui sawi a nih apianga sawi reng tawh tur Mohamed Salah la luttu a ni a, Manchester City hel lai Virgil van Dijk hmintu a ni a, man tlawm taka Andy Robertson lei a, tuai hnumtu a ni a, Trent Alexander-Arnold chher hriamtu a ni a, goalkeeper ṭha mi Alisson la luttu a ni bawk - a hnathawh a nep lo.

Rodgers-a enkawl team a chhawm kha chuan kil tinah siam ṭhat ngai a awm a, a chhe lai thawm ṭhat tur a tam hle. Mahse, amah a chhuah ve dawn meuh chuan team nghet tak a kalsan a, a ruala an chhuak ve a nih ngawt loh chuan Liverpool hi ngaihtuahawm zui lutuk tur niin an lang lo - hei hi a ropuina hrilhfiahtu a ni.

Ngaihlai Liverpool

Klopp chuan a sulhnu thlirkirin, "Hei aia tam zawk nomawi chawi thei kan ni a, mahse, ka thlak danglam thei lo. Point khat chauha title kan chawi lohte kha - mahse, kha pawh kan ṭhatzia hrilhfiahtu tho a ni.

"Nomawi kan chawi teuh em emte kha kan sulhnuah ziah tel ni kher lo mah se, a hlu reng dawn. Midang awm ta se, kha ai khan an tiṭha ang em? An tihṭhat ngei ka ring a, kei erawh chuan ka tithei lo a ni. Mahse, mipuiin nakinah an thlirlet ang a, kan tiṭhathawkhat tih an hrethiam ang," a ti.

Klopp hian Liverpool hi Premier League-ah a vawi khat nan a champion pui a, FA Cup, League Cup (2), FA Community Shield, Champions League, UEFA Super Cup leh FIFA Club World Cup-ah te champion nomawi a chawipui.

Mahse, German coach hian hemi piahlamah sawi tur tam tak a nei - Champions League final-ah vawi hnih an chak lo a, season tluana a enkawl hmasak berah Champions League khel turin a hruai kir a, 2018-19 season-ah point 97 hmuin, pahnihna an ni a, 2021-22 season-ah point 92 hmuin pahnihna an ni leh a, pahnihna an nih vawi hnihah hian point khat ve vein City an phak lo!

Mangṭha a har

Klopp chuan Liverpool a enkawl tawp ber tur kar a nih avangin buai reng renga hun a hman thu a sawi a, Liverpool a hriatreng tawh tur thu a sawi tel bawk. Klopp chuan, "Kan kum a tam tulh tulh a, hun hi a liam zung zung ringawt mai a ni.

"He hmuna ka awm chhung hian theihtawp ka chhuah a, hlim taka hun hman ka tum ṭhin. Khawpui nuam leh danglam takah ṭhangkhat lian dawn ka awm a, ka suangtuah phaka club ṭha berah hun ka hmang a, he hmuna ni khat ka hman pawh hi ka theihnghilh lo ang.

"Duhthusam engmah a awm thei lo. Mahse, he hmuna lawm ka nih dan erawh ka hre reng tawh dawn. Liverpool khawpui hian min mamawh a nih phawt chuan, an tan ka awm reng ang," a ti.

Klopp chuan mangṭha a harsat thu sawiin, "Mangṭha tia inthlah hi engtiklai mahin a nuam ngai lo. Hrehawm ti hauh loin inmangṭha thei ta ila, he hmunah hian hun nuam tak kan hmang lo tihna a ni ang," a ti a, Liverpool a ngai dawn.