Mizoram hmaa ding tur Assam

Swami Vivekananda U20 Men’s National Football Championship-ah Mizoram chuan tukin zing dar 7:30 hian Assam nen quarterfinal an khel dawn. HC Zarzoliana enkawl Mizoram hian group stage-ah match thum khelin an chak vek a, Assam hneh tur pawha rinkai zawk an ni.

Ramakrishna Mission Ashrama Ground, Chhattisgarh-a inkhel hi Indian Football YouTube channel-ah a en theih ang. Mizoram hian group stage-ah hian Meghalaya (5-0) leh Rajasthan (7-0) a sawpin Maharashtra 3-2 in an hneh bawk.

Hmabak a êng

Football-ah chuan vanduai theih a ni a, chutihrualin group stage-a an khelh dan thlir chuan Mizoram squad a chhah ṭha tih a lang. Position tinah Mizoram an ṭha a, match tawp berah an theihna tak tak an lang lehzual.

Zara hian mual sir aṭangin captain Lalthankima leh Sawma Tlangte te hmangin a nawr a, winger pahnih hi Santosh Trophy-a Mizoram winger-te tho an ni. Thathana leh Sawma te hian Arunachal Pradesh-ah tawnhriat an neih belh a, an rualpui zingah an chungnung phah hle.

Chutihrualin Mizoram hi player pahnih chauha innghat anga sawi a rem lo. Midfielder Lalngaihsaka hi game siamtu a ni a, a bula ding Lalremtluanga (Mamatea) hian football kal hmang a man viau bawk. Rajasthan lakah Lalrothlanga'n hattrick a siam a, ani hi MPL10-a Mizoram Police champion puitu zinga mi a nih avangin tlarhma lamah a ṭangkai hle.

Assam hi...

Assam hi an state a lian a ni ringawt lo a, ISL club NorthEast United innghahna an nih avangin tun hnaiah hma an sawn. Group match hmasa berah Madhya Pradesh nen goal awm loin an inhnethawk a, match hnihnaah erawh Tripura 6-0 ngawtin an sawp.

Group match hnuhnung berah Assam-in Santosh Trophy thleng thei khawpa tun hnaia hmasawn Arunachal Pradesh an hmachhawn a, 1-0 in an chak. Chakna goal khungtu Gwgwmsar Gayary hian Tripura an sawp ṭum pawhin goal hnih a khung.

Engtin zel?

U20 NFC hi phase liah ṭhen a ni a, phase thum dang chu zawh daih tawh a ni. Mizoram leh Assam te group khelh ṭan hma hian Manipur, Karnataka leh Delhi ten semifinal an lut tawh.

Mizoram hian semifinal an lut thei a nih chuan Delhi an hmachhawn dawn a, champion theihna kawng a inhawng. Mizoram coach HC Zarzoliana chuan, "Assam hi an game hi an ṭha ve khawp mai a, chak tur chuan kan ṭan ve viau a ngai ang. Huphurh tur erawh a ni hauh lo a, Pathian zarah kan chak mai turah ka ngai," tiin Vanglaini a hrilh.